२२ फाल्गुन २०७०, बिहीबार १०:४१ बुधवार साप्ताहिक, नयाँबानेश्वर, काठमाण्डौं

केन्द्रीय सदस्यद्वारा तल जान इन्कार

एमालेको आठौं महाधिवेशनबाट पारित विधानले पहिलो पटक केन्द्रीय कमिटीका सदस्यहरूले पनि महाधिवेशन प्रतिनिधि हुनका लागि कार्यकर्ताबाट निर्वाचित भएर आउनुपर्ने व्यवस्था गरेको छ । तर, यस पटक केन्द्रीय कमिटीको बैठकमा बोल्ने अधिकांश सदस्यहरूले आफूलाई अप्ठेरो पर्ने भएकाले त्यो प्रावधान संशोधनका लागि महाधिवेशनमा प्रस्ताव लिएर भए पनि स्वत: प्रतिनिधि हुन पाउनुपर्ने माग गरेका छन् । एक पटक केन्द्रमा पुगेका नेताले कहिल्यै पनि फर्केर हेर्न नपर्ने र स्वत: प्रतिनिधि हुने कुरा राम्रो नभएको भन्दै अघिल्लो पटक एमालेले उक्त व्यवस्था गरेको हो । तर, अहिले त्यो निर्णय हचुवामा भएछ भन्दै केन्द्रीय सदस्यहरूले कार्यकर्ताबाट निर्वाचित भएर आउन आनाकानी गरिरहेका छन् । उनीहरूको प्राय: एउटै प्रकारको भनाइ छ– ‘कार्यक्षेत्र यतै भयो । अब यतिबेला कहाँ चुनाव लड्न तल जानु ? त्यसैले केन्द्रीय कमिटी र केन्द्रीय निकाय (अनुशासन आयोग, लेखा आयोग र निर्वाचन आयोग)का सदस्यहरूलाई स्वत: प्रतिनिधि हुन दिनुपर्छ ।’ यसो भएमा एमालेमा करिब दुई सय जना अनिर्वाचित व्यक्ति स्वत: प्रतिनिधि हुन पाउनेछन् ।