११ बैशाख २०७६, बुधबार ०६:१३ बुधवार साप्ताहिक, नयाँबानेश्वर, काठमाण्डौं

राष्ट्रपति भण्डारी आज चीन जाने

काठमाडौं । राष्ट्रपति विद्यादेवी भण्डारी आज ११ वजे जनवादी गणतन्त्र चीन प्रस्थान गर्दै छिन । चिनियाँ समकक्षी सी जिन पिङको विशेष निमन्त्रणमा उनी नौ दिने भ्रमणमा त्यसतर्फ जान लागेकी हुन् । उनको भ्रमणका लागि नेपाली राष्ट्रिय ध्वजावाहक विमान चार्टर गरिएको छ ।
राष्ट्रपति भण्डारीको भ्रमण टोलीमा परराष्ट्रमन्त्री प्रदिपकुमार ज्ञवाली, प्रदेश ३ का मुख्यमन्त्री डोरमणि पौडेल, सांसदहरू योगेश भट्टराई, ज्ञानेन्द्रबहादुर कार्की, कमला ओली, रामैश्वर राय यादव, राष्ट्रपतिका सल्लाहकारद्वय सुशील प्याकुरेल र लालबाबु यादव, परराष्ट्र सचिव शंकरदास बैरागी, चिफ अफ प्रोटोकल गेहेन्द्र राजभण्डारी, कान्तीपुर टेलिभिजनका अध्यक्ष कैलाश सिरोहिया, एबीसी टेलिभिजनका अध्यक्ष शुभशंकर कँडेल, चारजना सुरक्षाकर्मी र व्यवसायीसहित गरी ३४ जना सरकारी खर्चमा सो भ्रमण टोलीमा चीन जाँदै छन् भने त्यसबाहेक आफ्नै खर्चमा २८ जना जाँदै छन् ।
चीन भ्रमणका क्रममा आज सी जिन पिङको जन्मस्थान सियान जाने र भोलि मात्र बेइजिङ पुग्ने कार्यक्रम छ । फर्कंदा एक रात ल्हासा बसेर नेपाल फर्किने कार्यक्रम छ । चीनमा रहँदा राष्ट्रपति भण्डारीले बेइजिङमा दोस्रो बेल्ट एन्ड रोड फोरमको उद्घाटन सत्रलार्ई र चिनियाँ राष्ट्रपति सी जिङपङकले सञ्चालन गर्ने एउटा राउन्ड टेबुललाई पनि सम्बोधन गर्ने कार्यक्रम छ । दुई देशका राष्ट्रपतिबीच १६ गते औपचारिक वार्ता हुने जनाइएको छ । जहाँ पारवहन तथा यातायातसम्बन्धी प्रोटोकललगायत झण्डै आधा दर्जन सहमतिमा हस्ताक्षर हुने कार्यक्रम छ । पारवहन प्रोटोकलमा हस्ताक्षरसँगै नेपालको सामुद्रिक बन्दरगाहसम्मको पहुँचका लागि भारतसँगको मात्र निर्भरताको औपचारिक रूपमा अन्त्य हुनेछ ।