३० श्रावण २०७६, बिहीबार ०७:४४ बुधवार साप्ताहिक, नयाँबानेश्वर, काठमाण्डौं

पूर्वएमालेकै अभ्यास अनुशरणको प्रयास

काठमाडौं । नेपाल कम्युनिस्ट पार्टी (नेकपा) ले पूर्वएमाले समूहकै संगठनात्मक संरचनाअनुसार कमिटीहरू बनाएको छ । पार्टीका केन्द्रीय विभागदेखि, विधान र नियमावलीसमेत पूर्वएमाले समूहकै अभ्यासलाई निरन्तरता दिइए पनि पार्टी एकतामा भइरहेको ढिलाइले भने कार्यकर्ता पंक्तिमा निराशा छ ।
विधि, प्रक्रिया र मापदण्डबिनै सञ्चालित पूर्वमाओवादी समूह प्रचण्डको फलोअर्सजस्ता मात्र छन् । विधि, प्रक्रियाअनुसार पार्टी संचालन गर्ने, वैचारिक बहसका आधारमा निष्कर्षमा पुग्ने भन्दा पनि प्रचण्डलाई देवत्वकरण गर्दै उनकै आदेश र निर्देशनअनुसार सञ्चालित हुँदै आएको पूर्वमाओवादी समूहजस्तै नेकपा पनि त्यस्तै बन्ने हो कि भन्ने चिन्ता थियो । तर, यस्ता चिन्तालाई दूर हुनेगरी पार्टी सञ्चालनमा पूर्वएमालेकै शैली अनुशरण गर्न थालिएको छ ।
केन्द्रीय विभाग गठनसहित केन्द्रीय सदस्यहरूको कार्यविभाजनका सन्दर्भमा केन्द्रीय नेताहरूसँग बेग्लाबेग्लै छलफल गरेर उनीहरूको रुचिसमेत बुझ्ने लोकतान्त्रिक विधि नेकपाले अपनाएको छ । महासचिव विष्णु पौडेलले सबै स्थायी समिति सदस्यहरूमध्ये कतिपयलाई बोलाएर, कतिलाई टेलिफोन गरेर उनीहरूको जिम्मेवारीका सन्दर्भमा छलफल गरेका छन् । सबैको प्राथमिकता बुझेर त्यसअनुसार प्रस्ताव तयार पारेर निर्णय गर्दा भनेअनुसार नेताहरूले जिम्मेवारी नपाउन सक्छन् । तर, त्यसले प्रक्रियामा सहभागिता र स्वामित्व ग्रहण गर्ने वातावरण बन्ने भएकाले निर्णयलाई कम विवादित बनाउन सहयोग पु¥याउँछ । सबै नेताको रुचि र चाहना बुझेर महासचिव पौडेलले कार्यविभाजन प्रस्तावबारे अध्यक्षद्वय केपी ओली र पुष्पकमल दाहाल ‘प्रचण्ड’सँग छलफल गरेका छन् । सो प्रस्तावका आधारमा कार्यविभाजन गर्नेगरी नेकपाको सचिवालय बैठक बुधबार प्रधानमन्त्रीको सरकारी निवास बालुवाटारमा बस्दै छ ।