४ भाद्र २०७६, बुधबार ०१:३३ बुधवार साप्ताहिक, नयाँबानेश्वर, काठमाण्डौं

ओली भोलि सिंगापुर जाने

काठमाडौं । प्रधानमन्त्री तथा नेकपाका अध्यक्ष केपी शर्मा ओली उपाचारका लागि भोलि पुनः सिंगापुर जाँदै छन् । करिब एक साताअघि सिंगापुरमा उपचार गराएर फर्किएका ओली फलोअपका लागि सिंगापुर जान लागेका हुन् । स्रोतका अनुसार चिकित्सकले सिफारिस गरेका औषधिले साइड इफेक्ट गरेको छ कि छैन भन्ने हेर्न तत्कालै सिंगापुर जानुपरेको बताइएको छ ।
१४ वर्षअघि मिर्गाैला प्रत्यारोपण गरेका ओलीले यसअघि थाइल्यान्डमा नियमित चेकअप गराउँदै आएका थिए । तर यसपटक उनी मिर्गाैैलाको मात्र उपचार हुने विश्वकै उत्कृष्ट मानिने सिंगापुरको नेसनल युर्निभर्सिटी हस्पिटलमा गएका थिए । यसअघि साउन १८ मा त्यहाँ गएका ओली नौ दिनको उपचार पछि २७ गते स्वदेश फर्किएका थिए । त्यहाँको अस्पतालले यसअघि खाँदै आएको औषधी परिवर्तन गरेर नयाँ प्रयोगमा ल्याएकाले त्यसको साइड इफेक्ट हेर्न यसपटक पुनः सिंगापुर जानु परेको बालुवाटार स्रोतले जनाएको छ । उपचारमा कति दिन लाग्ने भन्ने टुंगो नभएकाले फर्किने तालिका सार्वजानिक गरिएको छैन । अघिल्लोपटक जाँदा फर्किने तालिका दुईपटक सार्नपरेकाले यसपटक पहिले नै सार्वजनिक नगरिएको बुझिएको छ ।