१८ भाद्र २०७६, बुधबार ०६:३० बुधवार साप्ताहिक, नयाँबानेश्वर, काठमाण्डौं

अध्यागमनमा सेटिङमा भुक्तानी

काठमाडौं । अनियमितताको अनुगमन गर्ने अख्तियारी प्राप्त अध्यागमन विभाग आफैंले अनियमित काम गरेको छ । विभागले गत आर्थिक वर्षको अन्त्यमा रातारात ठूलो रकम सेटिङमा भुक्तानी गरेको खुलेको छ ।
काम सम्पन्न नहुँदै असारको अन्तिममा विभागले साबिरा निर्माण सेवालाई ५० लाख रुपैयाँ भुक्तानी गरेको हो । सो निर्माण सेवाले कालिकास्थान परिशरमा रहेको क्यान्टीन र सुरक्षाकर्मी बस्ने भवन निर्मणको ठेक्का पाएको थियो । तर महानिर्देशक ईश्वरराज पौडेल, लेखा अधिकृत र अन्य एक कर्मचारीको मिलेमतोमा आर्थिक वर्ष २०७५÷७६ को ठेक्का ंभुक्तानीको काम काम नसकिँदै गरिएको हो ।
असार अन्त्यमा पुरै रकम निकास गरिएको भए पनि काम भने अझै सम्पन्न भइसकेको छैन । सरकारी लेखा प्रणालीमा त्यसरी काम नसकीँदै पुरै भुक्तानी दिन मिल्दैन । बरु त्यसरी भुक्तानी गर्ने लेखापाल र सदर गर्ने हाकिमको जागिरसमेत जान्छ । अझ अचम्मको कुरा त उक्त कामको इस्टिमेट र बिलसमेत सरकारी इन्जिनियरको सट्टा कमिसनका कारण निजी कन्सल्टेन्सीबाट गराइएको छ ।
यस कामको प्रबन्ध भने सोही कार्यालयमा अधिकृत रहेकी र इन्जिनियरिङसमेत पढेकी प्रज्ञा ढकालले गरेको विभागकै कर्मचारीहरू बताउँछन् ।
विभागमा जडित सिसीटिभी फुटेज अध्ययन गरेमा पनि काम सकिनुभन्दा अढाई महिनाअघि नै चेक काटेर भुक्तानी गरिएको स्पष्ट हुने देखिन्छ ।