९ पुष २०७६, बुधबार १०:४१ बुधवार साप्ताहिक, नयाँबानेश्वर, काठमाण्डौं

इन्सपेक्टर बढुवामा उस्तै अनियमितता

काठमाडौं । प्रहरी प्रधान कार्यालयले प्रहरी महानिरीक्षक सर्वेन्द्र खनालको निर्णयअनुसार ४ सय ४३ जना प्रहरी निरीक्षकहरूको सरुवा गरेको छ । २०७६ मंसिर ७ गतेको निर्णयअनुसार, २०७६ पुस महिनादेखि नै हाल दरबन्दी भएको स्थानबाट तलबभत्ता खानेगरी सरुवा भएको हो ।
सरुवा भएका प्रहरी अधिकृतहरूलाई पुस महिनादेखिको तलब, भत्तासमेत हाल सरुवा भएको दरबन्दीबाट खान पाउनेगरी व्यवस्था मिलाइएको कार्यालयले २०७६ पुस ७ गते एक सूचना जारी गरी जनाएको छ । कार्यालयले राष्ट्रिय किताबखाना (प्रहरी) लाई अभिलेखमा आवश्यक व्यहोरा मिलाउन अनुरोध गरेको छ । तर, यो बढुवामा पनि वैज्ञानिक मापदण्डभन्दा पनि भनसुन र पहुँचका आधारमा गरिएको गुनासो प्रहरीहरूबाटै आएको छ ।
केहीलाई सुगमबाट सुगममा र केहीलाई भने दुर्गमबाट दुर्गममा सरुवा गरिएको बताइन्छ । एक नम्बरमा बढुवा भएकी अनिता महतलाई कीर्तिपुर वृत्तबाट रानीपोखरीस्थित प्रहरी शिक्षालयमा सरुवा गरिएको छ । उनले माथिल्लो तहबाट पहुँच पु¥याएकाले संघयि राजधानीबाटै राजधानीमै राखिएको बताइन्छ । यसैगरी अनु लामालाई प्रहरी एकेडेमी महाराजगन्जबाट इलाका प्रहरी कार्यालय फर्पिङ सरुवा गरिएको छ । यसैगरी, अमृतबहादुर बस्नेतलाई पर्यटक प्रहरी भृकुटीमण्डपबाट दंगा नियन्त्रण गुल्म काठमाडौंमा, अरुणकुमार भट्टराईलाई इलाका प्रहरी कार्यालय ललितपुर कोन्ज्योसोमबाट प्रहरी प्रभाग बाँडेगाउँ ललितपुर सरुवा गरिएको छ । एउटै जिल्लामा उनको सरुवा भएको छ । यसैगरी ऋषिकुमार भट्टराईलाई प्रहरी वृत्त कालीमाटीबाट सवारी शाखा रानीपोखरीमा सरुवा गरिएको छ । यस्तो मनोमानी सरुवा थुप्रै भएको बताइन्छ ।