९ पुष २०७६, बुधबार १०:४२ बुधवार साप्ताहिक, नयाँबानेश्वर, काठमाण्डौं

केन्द्रीय कमिटी बैठक २३ पुसमा

काठमाडौं । नेपाल कम्युनिस्ट पार्टी (नेकपा) को केन्द्रीय कमिटी बैठक २३ पुसमा बस्ने भएको छ । गत आइतबार सम्पन्न स्थायी समिति बैठकले आगामी २३ पुसमा केन्द्रीय कमिटी बैठक आह्वान गरेको हो ।
अघिल्लो वर्ष ३ जेठ २०७५ मा पार्टी एकीकरण सम्पन्न भएपछि प्रधानमन्त्री निवास बालुवाटारमा लगत्तै १० जेठमा परिचय बैठकबाहेक नेकपाको केन्द्रीय कमिटी बैठक बस्न सकेको छैन । एकतापछि एजेन्डा केन्द्रित हुनेगरी भने नेकपाले पहिलोपटक बैठक आह्वान गरेको हो । एकपटक पनि पार्टी बैठकमा सहभागी हुन नपाउँदा नेकपाका केन्द्रीय सदस्यहरूबीच हार्दिक सम्बन्धसमेत स्थापित हुन सकेको छैन । दुई फरक स्कुलिङबाट आएकाहरूबीच आपसमा राम्रो चिनजानसमेत छैन ।
केन्द्रीय कमिटी बैठकअघि केन्द्रीय सचिवालय र स्थायी समिति बैठक आयोजना गरिने महासचिव विष्णु पौडेलले बताएका छन् । ती दुवैको छलफलबाट आवश्यकताअनुसार केन्द्रीय कमिटीको बैठकमा एजेन्डा प्रस्तुत हुनेछन् । केन्द्रीय कमिटीबाट उपाध्यक्षमा वामदेव गौतमको मनोनयनका साथै पार्टीको आगामी कार्ययोजना पारित गर्ने नेकपाको योजना छ । त्यस्तै, केन्द्रीय कमिटी बैठकअगावै १५ दिनभित्र पार्टी एकीकरणका बाँकी सांगठनिक कामहरू (आयोग तथा केन्द्रीय निकाय, विभाग र जनसंगठन) पूरा गरिसक्नेसमेत निर्णय गरेको छ ।