५ चैत्र २०७६, बुधबार ०७:३१ बुधवार साप्ताहिक, नयाँबानेश्वर, काठमाण्डौं

सरकारको उच्च सतर्कता

काठमाडौं । अन्तर्राष्ट्रिय रूपमा महामारीको रूप लिँदै १ सय ५० भन्दा बढी देशमा फैलिएको कोरोना भाइरसको रोकथाम, नियन्त्रणका लागि सरकारले उच्च सतर्कर्ता अपनाइरहेको छ । उपप्रधानमन्त्री ईश्वर पोखरेलको नेतृत्वमा रहेको रोकथाम तथा नियन्त्रण उच्चस्तरीय समितिको दिनहुँ बसिरहेको बैठकले दर्जनौं निर्णय गर्नुका साथै वडा तहसम्म जनचेतना फैलाउनेलगायत दर्जनौं कामलाई तीव्रता दिइरहेको छ । सरकारको उच्च सतर्कतालाई नागरिकहरूले पनि प्रशंसा गरिरहेका छन् ।
यसैक्रममा सरकारले कोरोना भाइरस संक्रमितको उपचारमा खटिने डाक्टर र नर्सलाई ७५ प्रतिशत भत्ता दिने निर्णय गरेको छ । उपप्रधानमन्त्री पोखरेलको संयोजकत्वमा बसेको पछिल्लो उच्चस्तरीय समितिको बैठकले उपचारमा खटिने अन्य स्वास्थ्यकर्मीलाई पनि ५० प्रतिशत भत्ता दिने निर्णय गरेको छ । त्यस्तै, संक्रमण रोकथाम तथा नियन्त्रणसँग सम्बन्धित कार्यमा खटिने निजामती, सुरक्षाकर्मी र नागरिक उड्डयन कार्यालयका कर्मचारीलाई पनि सुरु तलबमानको ५० प्रतिशत भत्ता दिने निर्णय समितिले गरेको छ ।
संक्रमितको उपचारका लागि स्वास्थ्य मन्त्रालयले काठमाडौं उपत्यकाभित्र एक सय २० वटा आईसीयू बेड अविलम्ब थप्ने निर्णय समितिले गरेको छ । टेकुस्थित शुक्रराज ट्रपिकल तथा सरुवारोग अस्पताल, वीर, पाटन, सैनिक अस्पताल, सशस्त्र प्रहरी अस्पताल र आयुर्वेद अस्पताल कीर्तिपुरमा २०–२० आईसीयू बेड थपिने समितिले जनाएको छ । त्यस्तै, प्रदेशहरूमा आवश्यकताअनुसार कम्तीमा एक सय १५ वटा आईसीयू बेडको व्यवस्था गर्न समितिले निर्देशन दिएको छ ।
कोरोना संक्रमितको उपचारका लागि खरिपाटीस्थित विद्युत् प्राधिकरणको तालिम केन्द्रलगायत उपत्यकामा रहेका स्वास्थ्य मन्त्रालयले तोकेका विभिन्न अस्पताल तथा भवनमा एक हजार बेडको व्यवस्था मिलाउने निर्णय पनि समितिले गरेको छ । उपचारका लागि सरकारले उपत्यकाका ६ अस्पताललाई तोकेको छ । हरेक अस्पतालमा एक सय ५६ स्वास्थ्यकर्मी खटाउने सरकारको तयारी छ । ४० बेड आईसीयू सञ्चालन हुने अस्पतालमा ३ सय १२ स्वास्थ्यकर्मी खटिनेछन् । आईसीयू व्यवस्थापनका लागि आवश्यक पर्ने ५१ प्रकारका उपकरण खरिदका लागि सूचीसहितको प्रस्ताव कार्यदलले मन्त्रालयमा पेस गरेको छ ।