२२ श्रावण २०७७, बिहीबार ०४:२१ बुधवार साप्ताहिक, नयाँबानेश्वर, काठमाण्डौं

उद्योगहरूमा कोरोनाको त्रास

काठमाडौं । लकडाउन हटेसँगै उद्योग–कलकारखानाहरू सञ्चालनमा आउन थालिसकेका थिए । देशभरि औद्योगिक क्षेत्रमा रहेका अधिकांश उद्योगहरू खुलेर काम सुचारु भइसकेका थिए । तर, पछिल्लो समय औद्योगिक क्षेत्रमा फेरि गतिरोध देखिन थालेको छ ।
केही दिनअघि धरान औद्योगिक क्षेत्रमा कार्यरत केही मजदुरमा कोरोना पोजिटिभ देखिएपछि अहिले सो औद्योगिक क्षेत्र पूरै बन्द गरिएको छ । सो औद्योगिक क्षेत्रमा कार्यरत ५–६ जना मजदुरहरूमा कोरोना पोजिटिभ देखिएको थियो । तर, लकडाउन हटेपछि भने सो औद्योगिक क्षेत्र ९० प्रतिशत सञ्चालनमा आइसकेको थियो । कोरोना पोजिटिभ देखिएसँगै पूरै औद्योगिक क्षेत्र नै बन्द गरिएको छ ।
लकडाउन हटेपछि देशभरिका १० वटा औद्योगिक क्षेत्रहरूमा सबैजसो सञ्चालनमा आइसकेका थिए । तराईको औद्योगिक क्षेत्रहरूमा रहेका उद्योगहरू कम सञ्चालित भए पनि अरू औद्योगिक क्षेत्रहरू भने शतप्रतिशत नै चल्न थालिसकेका थिए । जसमा बालाजु, पाटन, पोखरा र हेटौंडा औद्योगिक क्षेत्रका उद्योगहरू ९९ प्रतिशत सञ्चालनमा आइसकेका थिए । त्यस्तै भक्तपुर ९५, नेपालगन्ज ९५, बुटवल ८०, वीरेन्द्रनगर ८५ र गजेन्द्रनारायण औद्योगिक क्षेत्रका ८० प्रतिशत उद्योगहरू खुलिसकेका थिए ।
तर, उद्योगहरू खुले पनि काम भने पूर्ण रूपमा सञ्चालनमा आइरहेको छैन । लामो समयको लकडाउनका कारण उद्योगहरूलाई चाहिने कच्चा पदार्थहरूको अझै अभाव रहेको हुँदा अधिकांश उद्योगहरूमा ३०–४० प्रतिशतभन्दा बढी काम नभइरहेको बताइन्छ । अधिकांश उद्योगहरूलाई आवश्यक पर्ने कच्चा पदार्थ भारतलगायत देशबाट ल्याउनुपर्ने भएको हुँदा पनि उद्योगहरू पूर्ण रूपमा चल्न नसकेका हुन् ।