१४ आश्विन २०७७, बुधबार ०६:३४ बुधवार साप्ताहिक, नयाँबानेश्वर, काठमाण्डौं

एसएसपीहरू लागे डीआईजीको दौडमा

काठमाडौं । नेपाल प्रहरीको डीआईजीका लागि पाइपलाइनमा रहेका एसएसपीहरूले चलखेल थालेका छन् । सरकारले कानुनी अड्चन पार गरी डीआईजी बढुवाको लागि दरबन्दी निश्चीत गरेसंगै उनीहरूले गुप्त रूपमा थालेको दौडधुपलाई तीव्रता दिएका हुन् । सोमबारको निर्णयपछि नेपाल प्रहरीका आठ एसएसपीहरू डीआईजीमा बढुवा हुने भएका छन् । नेपाल प्रहरी ऐन र प्रदेश प्रहरी ऐनमा सोमबार सरकारले संशोधन अध्यादेश ल्याएपछि बढुवाका लागि बाटो खुलेको हो ।
प्रहरीमा अहिले तीन डीआईजीको पद रिक्त छ भने पाँच डीआईजीको दरवन्दी थप्न मन्त्रिपरिषद्मा प्रस्ताव पुगेको छ । ओएनएमसहित गएको सो प्रस्ताव आउने बैठकबाट पारित हुने सम्भावना रहेको एक एसएसपीले जानकारी दिए । त्यसपछि रिक्त हुने आठ डीआईजीमध्ये बढुवा हुन अहिलेको एसएसपीहरूले कसरत थालेका हुन् । गृहमन्त्री रामबहादुर थापा र गृहसचिव महेश्वर न्यौपाने पनि उक्त दरबन्दी थपको प्रस्ताव छिटोभन्दा छिटो पारित गरी निश्चित व्यक्तिहरूलाई बढुवा गर्न लालयित भएको बुझिएको छ । ज्येष्ठताका आधारमा अहिलेका आईजी शैलेश थापाका व्याजीहरू अब हुने डीआईजीको प्राथमिकता क्रममा छन् । तर, कसकसले बाजी मार्ने हुन् भन्ने कुरा भने अहिले नै यसै भन्न सकिने अवस्था छैन ।
डीआईजीका लागि एसएसपीहरू गणेशबहादुर ऐर, पुरुषोत्तम कँडेल, दिलीपकुमार चौधरी, राजेशकुमार लाल कर्ण, देवबहादुर बोहोरा, दिवेश लोहनी, सौरभ राणा, रामकृपाल साह, उमेश रञ्जितकार, सुशीलकुमार यादव, मुकुन्द आचार्य, हरिराज वाग्ले, पूजा सिंह, विक्रम चन्द, नलप्रसाद उपाध्याय, देवबहादुर बोगटी, मोहन आचार्य, राजेन्द्र चौधरी, नरबहादुर खत्री, मसाउद आलम खाँलगायत प्रतिस्पर्धामा छन् ।