२६ कार्तिक २०७७, बुधबार ०४:११ बुधवार साप्ताहिक, नयाँबानेश्वर, काठमाण्डौं

सत्तारूढमा विवाद, प्रतिपक्षमा मत्थर

काठमाडौं । सत्तारूढ दल नेकपाभित्र शीर्ष नेतृत्वबीच चुलिएको विवाद उत्कर्षमा पुगिरहेको बेला प्रमुख प्रतिपक्षी दल नेपाली कांग्रेसभित्र उत्पन्न विवाद भने केही मत्थर देखिएको छ । कांग्रेस सभापति शेरबहादुर देउवाले असन्तुष्ट पक्षको मागलाई सम्बोधन गर्ने संकेत देखाएपछि विवाद कम भएको हो ।
केही महिनापूर्व सभापति देउवाले एकलौटी रूपमा अधिकांश केन्द्रीय विभागहरूलाई पूर्णता दिएसँगै कांग्रेस विवादको भुमरीमा फसेको थियो । त्यसयता असन्तुष्ट समूहको नेतृत्व गर्दै आएका वरिष्ठ नेता रामचन्द्र पौडेलले सभापति देउवाविरुद्ध आक्रमण रवैया अपनाउँदै आएका थिए । पछिल्लोपटक असोज ११ गते पौडेल समूहले संस्थापन पक्षको निर्णयलाई सच्याउन माग गर्दै आफ्ना १६ बुँदे मागसमेत राखेका थिए । ती मागहरूमा केन्द्रीय विभागको विषय पनि उठाइएको थियो । पौडेल समूहले केन्द्रीय समितिको कार्यकाल सकिएपछि र महाधिवेशनको मुखमा आफ्ना पक्षका कार्यकर्ताहरूलाई खुसी तुल्याउन विभागहरू गठन गरेपछि त्यसको तीव्र विरोध जनाउँदै आएको थियो ।
तर, पछिल्लोपटक भने सभापति देउवा विभागको विषयबाहेक पौडेल समूहले उठाएका अरू मागहरू सम्बोधन गर्न सहमत देखिएसँगै चुलिँदै गएको विवाद केही मत्थर बन्न पुगेको हो । पौडेल समूहले क्रियाशील सदस्यता वितरणको विषयलाई प्रमुख रूपमा उठाउँदै आएको छ । अरू राजनीतिक दल परित्याग गरेर कांग्रेसमा प्रवेश गरेकाहरूलाई संस्थापन पक्षले क्रियाशील सदस्यता बाँड्न थालेपछि पौडेल समूहले त्यसमा आपत्ति जनाउँदै आएको छ । पछिल्लो समय राष्ट्रिय प्रजातन्त्र पार्टी परित्याग गरेर सुनीलबहादुर थापाको नेतृत्वमा सो पार्टीका केन्द्रीय तहका नेताहरूसमेत कांग्रेसमा प्रवेश गरेका थिए । उनीहरूलाई समेत क्रियाशील सदस्यता दिन तत्परता देखाएपछि पौडेल समूहले विरोध जनाउँदै आएको छ ।
आगामी फागुनमा महाधिवेशन गर्ने तयारीमा रहेको कांग्रेसको दसैंअघिदेखि केन्द्रीय समितिको बैठक बस्न सकेको छैन । बैठकका लागि संस्थापन पक्षले आह्वान गरे पनि आफ्ना मागहरू सम्बोधन नभएसम्म बैठकमा सहभागी नहुने अडानमा पौडेल समूह रहेको थियो । पौडेल समूहको अडानका कारण डाकिएको बैठक पनि स्थगित हुँदै आएको थियो । तर, गएको आइतबार संस्थापन र असन्तुष्ट पक्षबीच सहमति बनेसँगै कांग्रेसको केन्द्रीय समितिको बैठक चाँडै बस्ने सम्भावना बढेको छ ।