१ भाद्र २०७८, मंगलवार ०२:५० बुधवार साप्ताहिक, नयाँबानेश्वर, काठमाण्डौं

भारतमा पूर्वाधारमा १.३५ खर्ब लगानीको घोषणा

नयाँ दिल्ली । मुलुकको अर्थतन्त्रलाई बढावा दिन भारतले चाडैं १.३५ खर्ब डलर राष्ट्रिय पूर्वाधार योजना सार्वजानिक गर्ने भएको छ । आइतबार भारतको ७७ औं स्वतन्त्रता दिवसको अवसरमा आयोजित एक समारोहलाई सम्बोधन गर्दै प्रधानमन्त्री नरेन्द्र मोदीले सो घोषणा गरेका हुन् ।

पूर्वाधार योजनाले लाखौं भारतीय युवाले रोजगारीको अवसर पाउने प्रधानमन्त्री मोदीले बताए । ‘यसले स्थानीय निर्मातालाई विश्वव्यापीरुपमा प्रतिस्पर्धी बनाउनुको साथै मुलुकको आर्थिक समृद्धिको भावी सम्भावनाहरुको पनि विकास गराउँछ’ प्रधानमन्त्री मोदीले भने ।

कोरोना भाइरसको महामारीका कारण भारतको अर्थतन्त्र चालु आर्थिक वर्षको मार्च महिनासम्मा ७.३ प्रतिशतमा खुम्चिएको छ ।

९० मिनेट लामो मन्तव्यका क्रममा प्रधानमन्त्री मोदीले आफ्नो सरकारले सान् २०१४ देखि यता प्राप्त गरेका उपलव्धी र कोरोना भाइरसको भ्याक्सिन अभियानमा खेलेको भुमिकाबारे चर्चा गरेका थिए ।
‘यस कुरामा हामी गौरवान्ति छौं कि कोभिड १९ को भ्याक्सिनका लागि हामी अरु कुनै देशप्रति निर्भर रहनु परेन’ उनले भने । भारतले अहिलेसम्म ५ सय लाख डोज खोप दिइसकेको छ । ११ प्रतिशत भारतीय वयस्कलाई कोरोनाको पूर्ण खोप दिइसकिएको छ ।

प्रधानमन्त्री मोदीले भारतलाई कार्वन उत्सर्जनमुक्त बनाउने प्रतिवद्धतालाई पनि पुरा गर्ने बताए । आफ्नो सरकारले सन् २०४७ सम्म भारतलाई ऊर्जामा आत्मनिर्भर बनाउन विद्युतीय गतिशीलता, सौर्य ऊर्जा र ‘ग्रीन हाइड्रेजन’ मा लागनी गरिरहेको र यसले काबर्नडाइअक्साइड उत्सर्जन पनि नगर्ने बताए ।

हालै सम्पन्न टोकियो ओलम्पिकका सहभागी भारतीय एथलेटिक्स खेलाडीको प्रशंसा गर्दै प्रधानमन्त्री मोदीले मन्तव्य शुरु गरेका थिए । सो प्रतियोगितामा भारतले एक स्वर्ण, दुई रजत र चार कास्य पदक जितेको थियो ।