१२ चैत्र २०७०, बुधबार १०:५७ बुधवार साप्ताहिक, नयाँबानेश्वर, काठमाण्डौं

जिफन्टमा विष्णु नै दोहोरिने

काठमाडौं । मजदुरहरूको प्रतिनिधिमूलक संगठन नेपाल ट्रेड युनियन महासंघ (जिफन्ट)को छैटौं राष्ट्रिय महाधिवेशनको अन्तिम तयारी पूरा भएको छ । आउँदो चैत १४ गतेदेखि १७ गतेसम्म काठमाडौंमा हुने उक्त महाधिवेशनको उद्घाटन नेकपा (एमाले)का अध्यक्ष झलनाथ खनालले गर्नुहुनेछ ।
यस पटकको महाधिवेशनको नारा ‘रूपान्तरण श्रम शक्तिको विकासबाट’ छ । सो दिन भृकुटीमण्डपबाट जुलुस सुरु भई नेपाल प्रज्ञा–प्रतिष्ठानमा उद्घाटन हुनेछ । महाधिवेशन उद्घाटनकै दिन विदेशी अतिथिहरूका लागि आयोजित फोरम सोल्टी होटलमा हुने पनि महासंघले जनाएको छ । देशभरबाट ६ सय ५ जना प्रतिनिधि उपस्थित रहने उक्त महाधिवेशनको बन्दसत्र भने चैत १५ र १६ गते राष्ट्रिय सभागृहमा हुनेछ । सांगठनिक, राजनीतिकलगायतका प्रतिवेदनका साथै विधान संशोधन र आगामी कार्ययोजना प्रस्तुत हुने बन्दसत्रमा ती विषयहरूमा छलफल गर्न पाँच वटा समूह बनाइने पनि महासंघले जनाएको छ ।
विगतमा झंै यस पटक पनि केही पुराना मजदुर नेता बिदा हुने र केही नयाँ अनुहार नेतृत्व तहमा थपिने छन् । तर, अध्यक्षमा भने वर्तमान अध्यक्ष विष्णु रिमालले नै निरन्तरता पाउनुहुनेछ । अहिले महासंघको केन्द्रीय कार्यसमिति ५५ सदस्यीय छ । महाधिवेशन समापन भएको घोषणा चाहिँ चैत १७ गते एभरेस्ट होटलमा पत्रकार सम्मेलनमार्फत गरिनेछ ।