४ फाल्गुन २०७९, बिहीबार १३:१० बुधवार साप्ताहिक, नयाँबानेश्वर, काठमाण्डौं

नुवाकोट बस दुर्घटना : तीन जनाको मृत्यु , २० जना घाइते

४ फागुन, नुवाकोट । नुवाकोटको विदुर नगरपालिका–१२ चैनपुरमा बस दुर्घटना हुँदा मृत्यु हुनेको संख्या तीन पुगेको छ । मृत्यु हुनेमा विदुर नगरपालिका–३ का ७३ वर्षीय बाबुराम दर्जी र तारकेश्वर गाउँपालिका घर भई विदुर नगरपालिका–६ मा बस्ने ६ वर्षीय रामप्रसाद अर्याल रहेका छन् ।

बट्टार स्थित हावाघरबाट तारकेश्वर गाउँपालिका–१ दाङसिङ जाँदै गरेको बा २ ख ४५ नम्बरको बस अपराह्न ४ बजे दुर्घटना हुँदा २ जनाको घटनास्थलमा र १ जनाको त्रिशुली अस्पतालमा मृत्यु भएको जिल्ला प्रहरी कार्यालय नुवाकोटका प्रवक्ता एवं डीएसपी खगेन्द्रबहादुर खड्काले बताए ।

अस्पतालमा मृत्यु हुने महिलाको नाम खुल्न बाँकी छ । दुर्घटनामा २० जना यात्रु घाइते भएका छन् । घाइतेको त्रिशुली अस्पतालमा उपचार भइरहेको छ । बसका चालक र सहचालक प्रहरीको सम्पर्कमा नरहेको समेत प्रवक्ता खड्काले बताए । दुर्घटना हुनुको कारण खुलेको छैन । बस सडकबाट करिव ५० मिटर तल खसेको थियो ।