२४ बैशाख २०८०, आईतवार ०९:१४ बुधवार साप्ताहिक, नयाँबानेश्वर, काठमाण्डौं

सुनुवाइ समितिमा तीन दिनभित्र सांसदको नाम दिन सभामुखको निर्देशन

२४ वैशाख, काठमाडौँ । सभामुख देवराज घिमिरेले संसदीय सुनुवाइ समितिसहित दुई संयुक्त समितिमा रहने सांसदको नाम तीन दिनभित्र बुझाउन निर्देशन दिएका छन् ।

आज (आइतबार) प्रतिनिधिसभा कार्यव्यवस्था समितिको बैठकमा सभामुख घिमिरेले प्रमुख राजनीतिक दलका सचेतक र शीर्ष नेताहरूलाई तीन दिनभित्र समितिहरूमा रहने सांसदको नाम बुझाउन निर्देशन दिएका हुन् ।

संघीय संसद्का दुई समिति संसदीय सुनुवाइ समिति र राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समितिमा सदस्यहरू पूर्ण नहुँदा प्रधानन्यायाधीश र न्यायाधीश नियुक्ती लगायतका काममा असर पर्ने भएकाले तत्काल समिति गठन गर्न सभामुखले नाम बुझाउन भनेका हुन् ।

राष्ट्रिय सभाबाट संसदीय सुनुवाइमा बस्नेको नाम पठाइसकिएको छ भने प्रतिनिधिसभामा बस्नेको नाम बाँकी नै रहेको छ । दुवै समितिमा १५-१५ सदस्य हुन्छन् जसमध्ये १२ जना प्रतिनिधिसभा र ३ जना राष्ट्रिय सभाबाट हुने कानुनी व्यवस्था रहेको छ ।