२८ बैशाख २०८०, बिहीबार ०१:१३ बुधवार साप्ताहिक, नयाँबानेश्वर, काठमाण्डौं

ज्युँदा शहीद मुकेश कायस्थको निधन

२८ वैशाख, काठमाडौँ । विसं २०६२–०६३ को जनआन्दोलनका ज्युँदा शहीद बनेपाका मुकेश कायस्थको निधन भएको छ । कायस्थको बुधबार निधन भएको पत्रकार सिर्जना दुवालले फेसबुकमार्फत् जानकारी दिएकी छन् ।

जनआन्दोलनका क्रममा २७ चैत २०६२ मा प्रहरीले चलाएको गोली कायस्थको कञ्चटमा लागेको थियो । गोलीका कारण उनी अचेत बनेका उनलाई ११ महिनासम्म अस्पतालमा राखिएको थियो ।

बनेपाको विद्यासागर बोर्डिङ्ग स्कुलका विद्यार्थी मुकेशलाई गोली लागेपछि उनले आफ्नो अध्ययनलाई अगाडि बढाउन सकेनन् । गोलीका कारण उनलाई पक्षघात भयो । जसका कारण त्यसयता उनी हिँडडुल समेत गर्न सक्दैनथे । बनेपामा भएको सो गोलीकाण्डमा आन्दोलनमा सहभागी अर्का युवा शिवहरि कुँवरले सहादत प्राप्त गरेका थिए ।