२४ असार २०८०, आईतवार ०७:०९ बुधवार साप्ताहिक, नयाँबानेश्वर, काठमाण्डौं

गायक–अभिनेता रविन तामाङलाई राष्ट्रिय झण्डा ओढाएर श्रद्धाञ्जली

२४ असार, । दिवंगत रक गायक तथा अभिनेता रविन तामाङलाई राष्ट्रिय झण्डा ओढाएर अन्तिम श्रद्धाञ्जली अर्पण गरिएको छ । नेपाल संगीत तथा नाट्य एकेडेमीमा तामाङलाई मन्त्री, नेता, कलाकर्मीहरुलगायतले अन्तिम श्रद्धाञ्जली दिएका हुन् ।

तामाङको पार्थिव शरीरमा संस्कृति पर्यटन तथा नागरिक उड्डयनमन्त्री सुदन किरातीले राष्ट्रिय झण्डा ओढाएका थिए । यस्तै, सरकारकी प्रवक्ता तथा सञ्चार तथा सूचना प्रविधिमन्त्री रेखा शर्मा, कांग्रेस महामन्त्री गगन थापालगायतले पनि तामाङलाई अन्तिम श्रद्धाञ्जली दिएका छन् ।

गायक तामाङको सम्मानमा उनका दुई चर्चित गीतहरु केटाकेटी र गुलाबको गाएर ट्रिब्यूट गरिएको थियो । श्रद्धाञ्जली दिन फ्यान र कलाकर्मी बिहानैदेखि नक्सालस्थित एकेडेमीको परिसरमा पुगेका थिए । रविन तामाङको पार्थिव शरीरलाई आजै शोभा भगवतीमा अन्तिम संस्कार गर्ने तयारी छ ।

तामाङ गत मंगलबार बुढानिलकण्ठस्थित आफ्नै निवासमा मृत भेटिएका थिए । नेपाली रक ब्याण्ड ‘रबिन एन्ड दी रिभोलुसन’ का गायक तथा संगीतकार तामाङले गायन क्षेत्रलाई अमूल्य गुन लगाएका छन् । रबिन गायक मात्र थिएनन् अब्बल प्रस्तोता पनि थिए । उनले चलचित्रहरुमा पनि अभिनय गरेका छन् ।
उनका समकालीन सुगम संगीतमा रमाइरहेका बेला रबिन रक संगीतमा संघर्ष गरिरहेका थिए । उनको गीतसँगै चालीसको दशकको युवा पुस्ता हुर्कियो । पचासको दशकका तन्नेरीहरु टिटार समाउने भए र नेपाली रक संगीत स्थापित भयो । विदेशमा जन्मिएर हुर्किएका रबिनको व्यक्तित्व र शैली धेरैले नक्कल गरे ।