१३ श्रावण २०८०, शनिबार १२:२४ बुधवार साप्ताहिक, नयाँबानेश्वर, काठमाण्डौं

‘अवैधानिक अर्थतन्त्रलाई प्रोत्साहन गर्ने सरकारको नीतिले चरम आर्थिक संकट’

१३ साउन, काठमाडौं । प्रमुख प्रतिपक्षी नेकपा एमालेका महासचिव शंकर पोखरेलले वर्गीय समाजमा राज्य कमजोर हुने र नागरिक बलियो हुने सम्भावना नहुने बताएका छन् । बलियो राज्य निर्माणका लागि बलियो राष्ट्रिय शक्तिका रुपमा राजनीतिक दलहरुको विकास अपरिहार्य रहेको उनले बताए ।

‘लामो समय नेपालका राजनीतिक दलहरुले राज्यसत्ताविरुद्ध संघर्ष गर्नु परेका कारणले नेपाली समाज राज्यसत्ताको विपक्षी जस्तो बन्न पुगेको छ । नेपाल राष्ट्रको विकास र समृद्धिका लागि राज्य हाम्रो हो भन्ने साझा मनोविज्ञानको विकास जरुरी छ । आज शनिबार सामाजिक सञ्जालमार्फत उनले भने, ‘वर्गीय समाजमा राज्य कमजोर हुने र नागरिक बलियो हुने सम्भावना रहँदैन । त्यसैले बलियो राज्यको निर्माणका लागि बलियो राष्ट्रिय शक्तिका रुपमा राजनीतिक दलहरुको विकास अपरिहार्य छ ।

महासचिव पोखरेलले राजनीतिक अस्थिरता र सामाजिक अराजकताले राज्य दिन प्रतिदिन कमजोर भइरहेको बताएका छन् । उनले भनेका छन्, ‘नेपालीको मौलिक संस्कृतिमा भइरहेको विघटनले राज्यलाई थप कमजोर बनाइरहेको छ । उनले वर्तमान सरकारको वैधानिक अर्थतन्त्रलाई कमजोर बनाएर अवैधानिक अर्थतन्त्रलाई प्रोत्साहन गर्ने नीतिले चरम आर्थिक संकट सिर्जना भएको उल्लेख गरे । उनले सरकारकै कारण देशबाट ठूलो संख्यामा नागरिकहरु वैदेशिक रोजगारीमा पलायन भइरहेको उल्लेख गरे ।

जबसम्म हामीले मुलुकभित्रको श्रमशक्तिलाई उद्यमशीलता र रोजगारीका माध्यमवाट राष्ट्रनिर्माणको काममा लगाउन सक्तैनौ तबसम्म विकास र समृद्धिको कुरा कोरा कल्पना मात्र हुनेछ। महासचिव पोखरेलले भनेका छन्, ‘आउनुहोस् विकास र समृद्धिको वाटोमा मुलुकलाई कसरी अघि वढाउन सकिन्छ विषयमा केन्द्रीत भएर राजनीतिक विमर्श गरौ । सही राजनीति नै समग्र नीतिहरुको नीति हो ।