३० पुष २०७१, बुधबार ०९:५२ बुधवार साप्ताहिक, नयाँबानेश्वर, काठमाण्डौं

नाकामा बसेर नकाम

काठमाडौं । थानकोट वृत्तका डीएसपी प्रवीण धितालले नाकामा बसेर उठाउने धन्दा जारी राखेको गुनासो बढेको छ । उनले विभिन्न स्थानबाट नगद तथा जिन्सी सामान संकलन गर्न एक असई र सईलाई सादा पोसाकमा खटाएको बताइन्छ ।
डीएसपी खड्काले विश्वास गरेकामध्ये एक जना असई मिठु खड्का हुन् । खड्का बलम्बु चौकीका इन्चार्जसमेत थिए । धितालले खड्कामार्फत नै मुद्दा मिलाउने, लेनदेन गर्ने र कुरा नमिलेका गाडीमा छापा हान्ने गर्दै आएको बताइन्छ । उनी विगत छ वर्षदेखि सोही क्षेत्रमा बस्दै आएका छन् ।
यस्तै, नागढुंगा चौकीका इन्चार्ज सई महेश उपाध्यायले पनि नाकामा बसेर उठाउने धन्दा जारी राखेका छन् । उपाध्यायले वीरगन्जदेखि खिचापोखरीसम्म टान्सपोर्टबाट उठाउन लगाउने गरेको बताइन्छ । विशेषगरी ट्रान्सपोर्टमार्फत भित्रिने सामानमा बढी तस्करी हुने गरेको छ ।
सई उपाध्यायले एक हवल्दार र एक जवानलाई घुमुवाका रूपमा परिचालन गर्दै आएका छन् । हवल्दार ईश्वर खड्का र प्रकाश नामका जवान उनका विश्वासिला घुमुवा हुन् । सो क्षेत्रमा आउने जोसुकै इन्चार्जले पनि ३ देखि ६ महिनामै लाखौं जम्मा गर्ने प्रहरी वृत्तमा चर्चा हुन्छ । ६ महिना मात्र सो क्षेत्रमा बिताउन पाए पुग्नेगरी जम्मा गर्ने र त्यहाँबाट अन्यत्र हिँड्ने चलन छ । तर, उनी भने महानगरीय प्रहरी कार्यालयका एआईजी विज्ञानराज शर्माका पीए प्रहरी निरीक्षक शिव पोखरेलसँग सेटिङ मिलाएर सो क्षेत्रमा टिकिरहेको बताइन्छ । पोखरेल यसअघि कोटेश्वर ट्राफिकका इन्चार्ज  थिए भने त्यसअघि प्रबन्धको खुद्रा खरिदमा थिए ।