२३ भाद्र २०७२, बुधबार ०८:०२ बुधवार साप्ताहिक, नयाँबानेश्वर, काठमाण्डौं

साँझ–बिहान दूतको दौड

काठमाडौं । बारम्बार लम्बिएको संविधान निर्माण यस पटक गरेरै छोड्ने अभियानको नेतृत्व गरिरहेका एमाले अध्यक्ष केपी ओलीको व्यस्तता झन् बढेको छ । संविधानसभामा तीन दलले संयुक्त संशोधन दर्ता गरेलगत्तै अध्यक्ष ओलीसँग छिमेकी दुवै देशको नजर गाढा बनेको छ ।
शनिबार राति तीन दलले संयुक्त संशोधन दर्ता गरेपछि संविधान आउने पक्कापक्की ठानेर उत्तरी र दक्षिणी दुवै छिमेकीले ओलीसँग लामो परामर्श गरेका छन् । ओलीलाई भेट्न चिनियाँ राजदूत ऊ चुन्ताई आइतबार बिहान १० बजे ओली निवास बालकोट पुगेका थिए । बाहिर नल्याइएको छलफलका क्रममा राजदूत चुन्ताईले संविधान जारीकसरी हुन्छ ? जारी भएपछि मधेसीले के कस्तो उत्पात मच्चाउँछन् जस्ता विषयमा चासो राखेका थिए ।
सोही साँझ भारतीय राजदूृत रञ्जित राय अध्यक्ष ओलीलाई भेट्न बालकोट पुगेका थिए । यसअघिको एक भेटमा खरो कुरा भएपछि ओलीसँग बोल्दा विशेष सतर्कता अपनाउँदै आएका राजदूत रायले संविधान बन्न लागेकोमा खुसी प्रकट गर्दै त्यसप्रति आफ्नो मुलुकको सहयोग रहने बताएका थिए । स्रोतका अनुुसार, उक्त दिन अध्यक्ष ओली र राजदूत रायबीच निकै सौहार्द कुराकानी भएको थियो ।
अध्यक्ष ओलीसँग यसबीचमा अरू पनि कूटनीतिक भेटघाटहरू भइरहेका छन् । संविधान बनेको सात दिनभित्र सुशील कोइरालाले राजीनामा दिएपछि प्रधानमन्त्रीका स्वाभाविक दाबेदार मानिएका ओलीसँगै अहिल्यै कुरा गरेर भावी परिस्थितिको आँकलन गर्न चाहने कूटनीतिज्ञहरूको संख्या बाक्लिँदै गएको छ ।