२२ पुष २०७२, बुधबार ०८:४१ बुधवार साप्ताहिक, नयाँबानेश्वर, काठमाण्डौं

अख्तियारमा दुई आयुक्त रिक्त हुने !

काठमाडौं । अख्तियार दुरुपयोग अनुसन्धान आयोगमा दुई पद रिक्त हुने भएका छन् । सबभन्दा पुराना आयुक्त केशव बरालले संवैधानिक प्रावधानका कारण माघ ६ गते नियमित अवकाश लिँदैछन् भने अर्की आयुक्त सावित्री थापा गुरुङ चाहिँ बढी लोभका कारण बिदा हुनुपर्ने देखिएको छ ।
पूर्वएआईजी बराल ०६६ माघ ७ गते आयुक्तमा नियुक्त भए पनि शपथको अन्योलका कारण कार्यभार भने लोकमानसिंह कार्की प्रमुख आयुक्त भएपछि तीन वर्षअघि मात्रै सम्हालेका थिए । उनले कार्यभार सम्हालेका मितिले छ वर्ष गणना गर्न चाहे पनि संविधानमै नियुक्त भएका मितिले छ महिना कार्यकाल तोकिएको हुनाले अनिवार्य अवकाश लिनुपर्ने भएको छ ।
आरआर क्याम्पसमा प्राध्यापनरत आयुक्त गुरुङले भने उक्त संवैधानिक पदमा जानुअघि राजीनामा नै नदिएका कारण समस्या खडा भएको छ । उनको विषयमा अहिले सर्वोच्चमा मुद्दासमेत परेकाका कारण थप समस्या भएको छ । ०७१ चैत १९ गते आयुक्त नियुक्त भएकी गुरुङले विवाद हुने देखेपछि १४ महिननापछि ०७२ जेठ २८ मा त्रिभुवन विश्वविद्यालयबाट काज स्वीकृत गराएकी थिइन् । जबकि, संविधानको धारा २३८ (८) ले आयुक्तलाई कुनै पनि अरू पदमा काम गर्न अनुमति दिँदैन । अवकाशपछि पनि अरू कतै काम गर्न बन्देज लगाएको अवस्थामा उनले एक पदमा रहँदारहँदै अर्को पदमा जान देखाएको लोभले अहिले समस्यामा पारेको छ । आयुक्त गुरुङको क्रियाकलापले प्रमुख आयुक्त कार्कीलाई पनि अप्ठेरोमा पारेको छ । सिधै संवैधानिक प्रावधानको उल्लंघन भएको देखिँदादेखिँदै आयुक्त गुरुङलाई दैनिक कामकाजमा लगाइरहन मिल्छ कि मिल्दैन ? प्रश्न उब्जिएको छ ।