२९ भाद्र २०७३, बुधबार ०५:०७ बुधवार साप्ताहिक, नयाँबानेश्वर, काठमाण्डौं

देउवाको उम्मेदवार नै बेपत्ता

काठमाडौं । नेपाली कांग्रेसको भगिनी संगठन नेपाल महिला संघको आजबाट शुरु हुने अधिवेशनमा रामचन्द्र पौडेल समूहले सभापतिको उम्मेदवार टुंगो लगाए पनि संस्थापन समूहले भने अझै टुंगो लगाउन सकेको छैन ।

पौडेल समूहले सभापतिमा मीना पाण्डेलाई उठाउने भएको छ तर संस्थापन समूहले उठाउन चाहेको उम्मेदवार नै नेपालमा नरहेका कारण अन्तिम निर्णय गर्न नसकेको बुझिएको छ । स्रोतका अनुसार संस्थापन समूहले पार्टीको पूर्वकोषाध्यक्षसमेत रहेकी चित्रलेखा यादवको नाममा सर्वसम्मति खोज्न प्रयास गरिरहेको छ । तर, सर्वसहमति नजुटे उमा अधिकारीलाई अगाडि बढाउने कि भन्नेबारे छलफल भइरहेको छ । तर, अधिकारी हिजो बेलुकासम्म नेपालमा नै नरहेको पार्टी सभापति शेरबहादुर देउवानिकट स्रोतले बतायो । स्रोतले भन्यो– ‘उमाजी अहिले नेपालमा हुनुहुन्न, सम्भवत आजसम्म आइपुग्नु हुन्छ कि भन्ने छ, चित्रलेखाजीको नाममा सहमति नजुटे उमाजीलाई उम्मेदवार बनाउने कि के गर्ने भन्ने कुरा उहाँ स्वदेश आएर छलफल गरेपछि मात्र थाहा हुन्छ ।’ त्यसो त देउवा समूहबाट धना खतिवडाको नाम पनि सभापतिको उम्मेदवारका रूपमा चर्चामा छ । उमा नआए अथवा नउठेको खण्डमा धना उम्मेदवार बन्ने सम्भावना पनि त्यत्तिकै बलियो रहेको स्रोतले बतायो । संस्थापन समूहबाटै बालकृष्ण खाँड पत्नी मञ्जु खाँडले पनि सभापतिका लागि लबिङ तीव्र पारेको बताइन्छ ।

तरुणमा लफडा

असोज ३ गतेबाट गर्ने मिति तय भएको तरुण दलको अधिवेशन पर सार्न पौडेल समूहले लबिङ सुरु गरिसकेको बताइन्छ । नेविसंघमा आफ्नै गुटको कमजोरीका कारण अध्यक्षमा पराजित पौडेल समूह तरुण दलमा निकै कमजोर अवस्थामा छ । हार्ने निश्चित भएपछि आफ्ना प्रतिनिधि थप्नुप¥यो भन्दै बखेडा झिकेर अधिवेशन नै सार्ने षड्यन्त्रमा पौडेल समूह उत्रिएको स्रोतले बतायो । यसअघि भदौ २३ देखि २५ मा गर्ने भनिएको अधिवेशन आन्तरिक तयारी नपुगेको भन्दै असोज ३ लाई सारिएको हो ।

तरुण दलको सभापतिमा संस्थापन समूहबाट पदम पालुंगा, कर्ण मल्ल र पौडेल समूहबाट भुपेन्द्रजंग शाही, दामोदर कोइराला, टेकराज पौडेल लगायतको नाम चर्चामा छ ।