१० जेष्ठ २०७४, बुधबार ०९:०३ बुधवार साप्ताहिक, नयाँबानेश्वर, काठमाण्डौं

देउवाका चार हठले कांग्रेस पराजित

काठमाडौं । कांग्रेसका गढ मानिएका सहरी क्षेत्र र संविधान सभा निर्वाचनका बेला पनि जितेका ठाउँमा मा अनपेक्षित हार बेहारेपछि नेता रामचन्द्र पौडेल समूहले त्यसको दोष पार्टी सभापति शेरबहादुर देउवालाई लगाएको छ । निर्वाचनको समीक्षा गर्न सभापति देउवाले बैठक नबोलाएको भन्दै पौडेल समूह आफंै समीक्षामा जुटेको थियो । पौडेलको सम्पर्क कार्यलय अनामनगरमा सोमबार बसेको बैठकले पछिल्लो समयमा खासगरी चार प्रकरणमा देउवाले प्रदर्शन गरेको हठ नै पार्टी पराजयको कारण रहेको निष्कर्ष निकालिएको थियो ।

प्रहरी महानिरीक्षक नियुक्ति प्रकरण, विवादास्पद व्यक्तिलाई राजदूत नियुक्ति, प्रधानन्यायाधीशमाथिको महाअभियोग प्रकरण र अप्राकृतिक चुनावी तालमेलमा नेतृत्वले गरेको गल्ती नै पार्टी पराजयको मुख्य कारण भएको निष्कर्ष पौडेल समूहको भेलााले निकालेको थियो । विगतको गल्ती स्विकारेर नयाँ ढंगबाट अघि नबढे दोस्रो चरणको निर्वाचनमा योभन्दा लज्जास्पद हार भोगिने निचोड पनि सो भेलाले निकालेको स्रोतले बतायो । भेलाले दोस्रो चरणको निर्वाचनअघि नै सरकार परिवर्तन गरेर आफ्नो पार्टीले सरकारको नेतृत्व गर्ने हो भने त्यसले पार्टीलाई निर्वाचनमा ठूलो नोक्सानी गराउने भन्दै जेठ ३१ अघि सरकार परिवर्तन नगर्न नेतृत्वको ध्यानाकर्षण गराउने निचोड निकालेको स्रोतको दाबी छ ।
पौडेल समूहको भेलामा महामन्त्री शशांक कोइराला, नेताहरू प्रकाशमान सिंह, डा. रामशरण महत, बलबहादुर केसी, किरण यादव, धनराज गुरुङलगायतको उपस्थिति थियो ।