६ चैत्र २०७०, बिहीबार १०:२९ बुधवार साप्ताहिक, नयाँबानेश्वर, काठमाण्डौं

दस्तावेजमा छलफल सुरु

काठमाडौं । आउँदो जेठको अन्तिम साता काठमाडौंमा हुने नेकपा (एमाले)को नवौं महाधिवेशनको आन्तरिक तयारी तीव्र रूपमा सुरु भएको छ । एमालेको महाधिवेशन जेठ २४ देखि ३१ सम्म हुनेछ । महाधिवेशनको तयारीका लागि हिजो बसेको मूल व्यवस्थापन समितिको बैठकले सचिवालय गठन गरेको छ ।
समितिका संयोजक ईश्वर पोखरेलको संयोजकत्वमा गठित सचिवालयका सदस्यहरूमा सबै उपसमितिका संयोजकहरू, उपत्यका, बाग्मती र नारायणी अञ्चलका संयोजकहरू रहने जनाइएको छ । सचिवालयका सदस्यहरूमा सुरक्षा उपसमितिका संयोजक विष्णुप्रसाद पौडेल, जनपरिचालनका संयोजक शंकर पोखरेल, खाद्यका संयोजक मुकुन्द न्यौपाने, आर्थिकका संयोजक सुरेन्द्र पाण्डे, आवासका संयोजक गंगालाल तुलाधर, प्रचारका संयोजक प्रदीप ज्ञवाली, अतिथि सत्कारका संयोजक भीम रावल, स्वास्थ्यका संयोजक योगेश भट्टराई, प्रमाणीकरणका संयोजक युवराज ज्ञवाली, सांस्कृतिकका संयोजक वाचस्पति देवकोटा, मञ्च व्यवस्थापनका संयोजक विष्णु रिमाल, उपत्यकाका संयोजक कृष्णगोपाल श्रेष्ठ, बाग्मतीका संयोजक पशुपति चौलागाईं र नारायणीका संयोजक काशीनाथ अधिकारी छन् । सचिवालयको सचिवमा विष्णु रिमाललाई तोकिएको छ । साथै, समितिको बैठकले महाधिवेशनका सबै दस्तावेज व्यवस्थित राख्नका लागि अभिलेखन उपसमिति र यातायात उपसमिति गठन गर्नुपर्ने निर्णय पनि गरेको छ । यसअघि महाधिवेशनको उद्घाटनका लागि भृकुटीमण्डपस्थित हल तोकिए पनि जेठ २४ सम्म त्यहाँ पुस्तक प्रदर्शनी चल्ने भएको हुँदा स्थान परिवर्तन गरिने बताइएको छ ।
यसैबीच, एमालेको नवौं महाधिवेशनमा प्रस्तुत गरिने तीन वटा दस्तावेजमाथि गएको सोमबारदेखि छलफल सुरु भएको छ । सोमबारको छलफलमा अध्यक्ष झलनाथ खनालले विषयवस्तुमा प्रवेश गराउनुभएपछि उपाध्यक्ष वामदेव गौतम, सचिव शंकर पोखरेल, भीम रावल, सुरेन्द्र पाण्डे र घनश्याम भुसालले भाग लिनुभएको थियो । आजदेखि कुन–कुन विषय समेटेर जाने भन्नेमा दस्तावेजहरूमाथि पुन: छलफल सुरु हुनेछ । अध्यक्ष खनालको संयोजकत्वमा गठिन दस्तावेज मस्यौदा कमिटीले राजनीतिक, सांगठनिक र विधान संशोधन गरी तीनवटा बेग्लाबेग्लै दस्तावेज तयार पार्नेछ । अध्यक्ष खनाल, महासचिव पोखरल र सचिव ज्ञवालीको संयोजकत्वमा तीनवटा कार्यदल बनाएर काम छिटो बनाउनुपर्ने गरी छलफल भइरहेको बताइएको छ ।