१९ चैत्र २०७०, बुधबार ०८:४६ बुधवार साप्ताहिक, नयाँबानेश्वर, काठमाण्डौं

ईश्वरको लबिङ सुरु

काठमाडौं । नेकपा (एमाले)को आसन्न नवौं महाधिवेशनमा फेरि महासचिवमा उठ्ने गरी वर्तमान महासचिव ईश्वर पोखरेलले आन्तरिक लबिङ तीव्र पारेका छन् । पहिलो चरणमा उनीनिकट केन्द्रीय कमिटीका केही नेता महासचिवमा पोखरेलको नाममा मन्जुरी बटुल्ल स्थायी र पोलिटब्युरोमा रहेका केही नेताको घर–घरमा धाएका छन् ।
पोखरेलको नाममा समर्थन जुटाउने कामको नेतृत्व उनीनिकट मानिने केन्द्रीय सदस्य राजेन्द्र गौतमले गरिरहेको विश्वस्त स्रोतले बतायो । स्रोतका अनुसार पछिल्ला १० दिन यता उनी त्यही एजेन्डा लिएर विभिन्न नेताको घरमा पुगिसकेका छन् । महाधिवेशनको मुखमा वैचारिक बहस सुरु भइरहेको समयमा अहिल्यै पदीय दौडमा उत्रिएर हिँड्नु राम्रो होइन भन्दै गौतमलाई नेताहरूले फर्काउने गरेको बुझिएको छ । अरूको नाममा चाहिँ एउटै व्यक्ति पटक–पटक दोहोरिने कुरा राम्रो होइन भन्दै हिँड्ने तर आफ्नो हकमा त्यही शैली देखाउने भन्दै उनको आलोचना सुरु भएको छ ।
नेताहरूसँगको भेटमा पोखरेलका प्रतिनिधिहरूले घुमाउरो तरिकाले वर्तमान सचिवद्वय विष्णु पौडेल र शंकर पोखरेलको आलोचना गर्ने गरेको पनि स्रोतले बतायो । पोलिटब्युरो सदस्यहरू केशव बडाल, मुकुन्द न्यौपाने, महेन्द्र पाण्डेलगायतका केही नेताहरूको समूहले पार्टीको भावी महासचिवमा शंकरलाई अगाडि सार्ने तयारी गरेको सन्देश पाएपछि ईश्वरले आफ्नो पक्षमा लबिङ तीव्र बनाएको दाबी स्रोतको छ ।