१९ चैत्र २०७०, बुधबार ०८:५४ बुधवार साप्ताहिक, नयाँबानेश्वर, काठमाण्डौं

सुपारी तस्कर हायल–कायल

काँकडभिट्टा । इलाका प्रहरी कार्यालयले भन्सारमा कडाइ गरेपछि सुपारी तस्कर र लत्ता कपडाको अवैध कारोबार गर्नेहरू त्राहीमाम भएका छन् । प्रहरीको कडाइले भन्सार राजस्वमा पनि वृद्धि भएको छ ।
प्रहरीले दिनहुँजसो ठूलो परिणाममा अवैध सामान पक्राउ गरेर भन्सारलाई बुझाउने गरेको छ । यही चैत ११ गते झापाको मेची नगरबाट भारततर्फ लैजाँदै गरेको २ हजार २ सय २० केजी अवैध सुक्खा सुपारी इप्रका काँकडभिट्टाले बरामत गरी भन्सार कार्यालयलाई बुझाएको थियो । उक्त सुपारीको मूल्य २ लाख ४४ हजार २ सय रुपियाँ बराबरको रहेको बताइन्छ । सोही दिन ३ लाख ४ सय ४० रुपियाँ मूल्य बराबरको कपडा पनि बरामत गरिएको इप्रका काँकडभिट्टाले जनाएको छ ।
त्यस्तै, गत शनिबार मात्र लुकाई–छिपाई मेची नगरपालिकबाट भारततर्फ र सोही बाटो हुँदै भारतबाट नेपालतर्फ ल्याइँदै गरेको विभिन्न किसिमका सैम्पु, साबुन, कपडा, जुत्ता, चप्पडल र हार्डवेयरका २ लाख २ हजार सात सय मूल्य बराबरका सामान सोही प्रहरी कार्यालयबाट खटिएको टोलीले बरामत गरी भन्सारलाई बुझाएको थियो । त्यसको केही दिनअघि पनि १६ लाख ५१ हजार मूल्य बराबरको सुक्खा सुपारी र ४ लाख मूल्य बराबरको लत्ताकपडा बरामत गर मेची भन्सारलाई बुझाएको इप्रका काँकडभिट्टाले जनाएको छ ।
काँकडभिट्टा नाकाबाट हुने  तस्करी नियन्त्रणमा प्रहरीले सक्रियता बढाएपछि यस क्षेत्रका अवैध धन्दामा संलग्नहरू घायलकायल भएका छन् । सोमबार पनि ज्यामिरगढी गाविसको विभिन्न स्थानबाट लुकाइछिपाइ भारततर्फ र भारतबाट नेपाल लाँदै गरेको ६ हजार १ सय ७५ केजी सुक्खा सुपारी, रासायनिक मल, सुर्ती र एउटा मोटरसाइकल बण्रामद गरी भन्सार कार्यालयलाई बुझाएको छ । बरामद भएको उक्त सामानको मूल्य ८ लाख १० हजार १५० रुपियाँ बराबर भएको इप्रका काँकडभिट्टाले जनाएको छ ।