३ बैशाख २०७१, बुधबार ०७:४६ बुधवार साप्ताहिक, नयाँबानेश्वर, काठमाण्डौं

ओली आज आउँदै

काठमाडौं । एमाले संसदीय दलका नेता केपी ओली स्वास्थ्य उपचार गरेर ४५ दिनपछि आज स्वदेश फर्किंदै हुनुहुन्छ । अपराह्न २:५५ बजे एअर इन्डियाबाट उहाँ फर्किंदा ठूलो मात्रामा स्वागत गर्ने तयारी भइरहेको छ ।
सात वर्षअघि दिल्लीस्थित अपोलो अस्पतालमा मृगौला फेर्नुभएका ओलीलाई पछिल्लो पटक संक्रमणले सताएको थियो । राजधानीको ग्रान्डी अस्पतालमा दुई साता उपचार गर्दा पनि पूर्ण नियन्त्रणमा नआएपछि गत फागुन १८ गते उहाँ दिल्ली जानुभएको थियो । त्यहाँको साकेतस्थित म्याक्स अस्पतालमा डा. अनन्तकुमारले २७ दिनसम्म त्यहीँ भर्ना गरेर उहाँको उपचार गर्नुभएको थियो भने त्यसपछि १७ दिन उहाँ सुल्तानपुस्थित इम्पायर अपार्टमेन्टमा आराम गरेर चिकित्सकको निगरानीमा हुनुहुन्थ्यो । ‘फलो अप’ परीक्षणहरू सन्तोषजनक देखिएका कारण चिकित्सकहरूले उहाँलाई घर फर्किन अनुमति दिएका हुन् ।
तर, ओलीलाई धेरै दौडधुप नगर्न र आराम गर्न चिकित्सकले सल्लाह दिएका छन् । मिर्गाैला प्रत्यारोपण गरिसकेको बिरामीको शरीरको प्रतिरोध क्षमता कमजोर हुने भएकाले सानोतिनो रोगले पनि आक्रमण गरेपछि तुरुन्तै सञ्चो नहुने भएका कारण उहाँलाई धेरै जनसम्पर्कमा नरहन र कडा पथपहरेज गर्न उनीहरूले सुझाव दिएका छन् ।