१७ बैशाख २०७१, बुधबार ०८:०३ बुधवार साप्ताहिक, नयाँबानेश्वर, काठमाण्डौं

सीपी तीर्थव्रतमा

काठमाडौं । श्रीमतीका कारण पटक–पटक विवादमा पर्दै आएका माओवादी नेता सीपी गजुरेल त्यही कारण फेरि विवादमा तानिएका छन् । बाहिर धर्मकर्मको विरोध गर्ने तर व्यवहारमा श्रीमतीको कुनै पनि आग्रह टार्न नसकेर धर्मभीरु बन्नुपर्ने बाध्यताले गजुरेललाई विवादमा तान्ने गरेको हो ।
गत साउनमा श्रीमतीको पछिल्तिर लाइनमा उभिएर भक्तपुरको डोलेश्वर मन्दिर दर्शन गरेको तस्बिर सार्वजनिक भएपछि चर्चामा आएका गजुरेल पछिल्लो पटक पार्टीका कसैले थाहा नपाउने गरी तीर्थाटन गरेर फर्किएका छन् । चैत महिनाभर म्याग्दीको बेनीमा लाग्ने तातोपानी मेला भर्न जान श्रीमतीले कर गरेपछि पार्टीसँग म्याग्दी वरपरका जिल्लामा प्रशिक्षणमा सहभागी हुने बहाना देखाएर गजुरेल तातोपानी नुहाउन पुगेका थिए । तातोपानी नुहाएर केही दिन श्रीमतीलाई उतै राखेर उनी वरपर कास्की, मनाङलगायतका जिल्लामा कार्यकर्तालाई प्रशिक्षण दिएर काठमाडौं फर्किएका थिए ।
त्यसअघि श्रीमतीकै कारण आफ्ना चालकलाई दलित भएकै कारण जागिरबाट हटाउन पनि उनी पछि परेका थिएनन् । यो प्रकरण अहिले पनि पार्टी कार्यालय बुद्धनगरमा सेलाएको छैन ।