२१ जेष्ठ २०७१, बुधबार ०६:१८ बुधवार साप्ताहिक, नयाँबानेश्वर, काठमाण्डौं

ओली स्वदेश फिर्ता काम गर्न सक्ने दाबी

काठमाडौं । १ महिना ३ दिन लामो उपचारपछि एमाले नेता केपी ओली मंगलबार स्वदेश फर्किनुभएको छ । गत माघ २० गते संसदीय नेता निर्वाचित भएयता लगातार जस्तो उपचारका क्रममा स्वदेश र विदेशका अस्पतालमा बसिरहनुभएका ओलीले अब आफू काम गर्न सक्ने गरी फर्केको जानकारी पनि दिनुभएको छ ।
गत वैशाख १७ गते काठमाडौंमा उपचार असम्भव भएपछि हवाई एम्बुलेन्समार्फत ओलीलाई मेनेन्जाइटिसको उपचारका लागि थाइल्यान्डको राजधानी बैंककतर्फ लगिएको थियो । त्यहाँस्थित बुमरुमगार्ड अस्पतालमा उपचारपछि डिस्चार्ज गरिनुभएका उहाँ थेरापीका लागि थप दुई साता बैंककमा बस्नुभएको थियो ।
नेता ओली सात वर्षअघि प्रत्यारोपण गरिएको मिर्गाैला, शरीरमा प्रतिरोधी क्षमता कमजोर हुँदा उत्पन्न फंगस र पछिल्लो चरणमा मेनेन्जाइटिसका कारण ओलीले संसदीय दलको नेता भएयता एक पटक पनि न संसदीय दलको अध्यक्षता गर्न सक्नुभएको छ, न त केन्द्रीय कमिटीको बैठकमा भाग लिन नै सक्नुभएको छ । नवौं महाधिवेशनको सन्दर्भ पारेर देशव्यापी कार्यकर्ता भेला, बैठक र जमघटहरू भइरहँदा ओली भने ती कुनैमा पनि उपस्थित हुन सक्नुभएको छैन । घरैमा कार्यकर्ता भेटघाट र दिल्लीबाट फर्किएपछि एकाध सार्वजनिक कार्यक्रममा भाग लिँदा गम्भीर बिरामी परेपछि उहाँलाई हवाई एम्बुलेन्समार्फत बाहिर लानुपरेको थियो ।
यता, ओलीको अनुपस्थितिमा उहाँका नाममा भेला र बैठकहरू भइरहे पनि अर्को थरी नेता–कार्यकर्ताले भने स्वास्थ्यकै कारण ओली अध्यक्षमा नउठ्ने अड्कल गरेका छन् । बिरामी ओलीलाई आराम गर्न दिनुको साटो चुनावमा धकेलेर आफूलाई सुरक्षित बनाउनका लागि केही नेताहरूले भगीरथ कोसिस गरिरहेका छन् ।