४ असार २०७१, बुधबार ०६:५७ बुधवार साप्ताहिक, नयाँबानेश्वर, काठमाण्डौं

ईश्वरको अर्को नौटंकी

काठमाडां । पार्टीभित्रका नामुद कलाकार भन्नासाथ चिनिने एमाले महासचिव ईश्वर पोखरेल कलाकारितामा कतिसम्म पोख्त रहेछन् भन्ने उदाहरण आफू स्वयम्ले सोमबार उद्घाटित गरेका छन् । आफ्नो विचार सार्वजनिक गर्ने नाममा आफूनिकट केही पत्रकारलाई बोलाएर उनले लिखित कुण्ठा त व्यक्त गरे नै, सँगसँगै आफूलाई अब्बल कलाकारका रूपमा पनि प्रमाणित गराए ।
छोराको बिहेदेखि गुटका भेलासम्म अल्फाबिटामा हुँदै आएकोमा पोखरेलले सोमबारको कार्यक्रम तीनकुनेस्थित सिद्धार्थ कटेजमा राखेकोमा पत्रकारले समेत आश्चर्य मानेका थिए । कार्यक्रममा २२ बुँदे आफ्नो लिखित विचारसहित प्रस्तुत भएका पोखरेलले अन्तिम बुँदामा आफूलाई केहीे साथीहरूले खुट्टा किन कमाउने ? तपार्इंकै अध्यक्षतामा नयाँ टिम निर्माण चाहिँ किन गर्न नहुने भनेर सोध्ने गरेको भन्दै कुण्ठा व्यक्त गरेका हुन् ।
बढीजसो पार्टीका युवा नेताहरूको गालीगलौजमा खर्चिएको उनको लिखतमा उनी स्यवम्ले आफ्नो विगत बिर्सिएको वा अर्को चमत्कारी नाटक मञ्चन गरेको सहजै अनुमान लगाउन सकिन्छ । युवाहरूलाई पारसमणिको संज्ञा दिएका उनले भनेका छन्– ‘आफूले फलामलाई छोए सुन हुन्छ र सुनलाई छोए फलाम पनि सुन हुन्छ भ्रम उहाँहरूमा छ ।’ उनले अगाडि लेखेका छन्– ‘आफूलाई काँधमा बोक्नेलाई भर्भराउँदो युवा देख्ने र अलिकति आलोचनात्मक चेत राख्नेबित्तिकै उनीहरूप्रति पूर्वाग्रह राख्ने कतिपय नेताका कारण नेतृत्वको विकासमा समस्या उत्पन्न भएको छ ।’ यसो भनेर उनले माधव नेपालप्रति लक्षित गर्न खोजेका थिए । जबकि हिजो माधव नेपालसँग रहुन्जेल उनले माधवलाई नै सुन देख्थे, आज २० बर्से सिन्डिकेटमा हस्ताक्षरर गरेर केपी ओली गुटमा गएपछि ओलीलाई नै सुन देख्न थालेका छन् । कार्यक्रममा नेता पोखरेलको प्रस्तुतिले ओली समूह रक्षात्मक अवस्थामा पुगेको छनक दिएको थियो । डनवाद र धनवादको कुरा कोट्याएर किन तपार्इंहरू रक्षात्मक बन्नुभएको हो ? भन्ने पत्रकारहरूको प्रश्नमा उनी नाजवाफ भएका थिए ।