२४ भाद्र २०७१, मंगलवार ११:२५ बुधवार साप्ताहिक, नयाँबानेश्वर, काठमाण्डौं

प्रज्ञा प्रतिष्ठानमा कसलाई के जिम्मा ?

काठमाडौं । नेपाल प्रज्ञा–प्रतिष्ठानका नवनियुक्त प्राज्ञहरूको विभागीय जिम्मेवारी बाँडफाँट गरिएको छ । मंगलबार प्रतिष्ठानका कुलपति प्रा.गंगाप्रसाद उप्रेतीको अध्यक्षतामा बसेको बैठकले प्राज्ञहरूलाई रुचि अनुसारको जिम्मेवारी दिएको हो ।
कुलपति उप्रेतीले समाजशास्त्र तथा मातृभाषा विभागको जिम्मेवारी आफूसँग राखेका छन् भने उपकुलपति डा.विष्णुविभू घिमिरेले संस्कृति विभाग पाएका छन् । यसैगरी अरुभन्दा बढी जनसम्पर्क र कामको चाप भएको मानिने काव्य विभाग प्रमुख अमर गिरी बनेका छन् भने आख्यान विभाग प्रमुखको जिम्मा मातृका पोखरेलले पाएका छन् । काव्य विभागले ‘कविता’ नामक त्रैमासिक पद्य पत्रिका निकाल्छ भने आख्यान विभागले ‘समकालीन साहित्य’ नामक गद्य पत्रिका निकाल्छ । मातृभाषा साहित्य विभाग प्रमुखमा श्रवण मुकारुङ, समालोचना विभाग प्रमुखमा डा.ज्ञानु पाण्डे, भाषा विभाग प्रमुखमा डा.हेमांगराज अधिकारी, दर्शनशास्त्र विभाग प्रमुखमा प्रा.दिनेशराज पन्त, अनुवाद विभागमा प्रा. डा.उषा ठाकुर र लोकवार्ता विभाग प्रमुखमा नर्मदेश्वरी सत्यालले जिम्मेवारी पाएका छन् ।
सदस्य–सचिव प्रा.डा.जीवेन्द्रदेव गिरीले भने कुनै विभाग लिएका छैनन् । दैनिक प्रशासनिक काम चलाउनुपर्ने भएको हुँदा उनले कुनै विभाग नलिएका हुन् । गत भदौ २२ गते प्रज्ञा–प्रतिष्ठानमा प्राज्ञहरू नियुक्त भएका थिए ।