२५ भाद्र २०७१, बुधबार ०८:२३ बुधवार साप्ताहिक, नयाँबानेश्वर, काठमाण्डौं

कर्णलाई माओवादी कति प्यारो !

काठमाडौं । मन्त्री भएपछि एमाओवादीनिकट कर्मचारीहरूलाई मौका दिइएको आरोप झेल्दै आएका उद्योगमन्त्री कर्णबहादुर थापाले पुन: एक पटक एमाओवादी निकटस्थ एक जना उपसचिवलाई मन्त्रालयको महत्त्वपूर्ण महाशाखामा ल्याएका छन् । ती भाग्यमानी उपसचिव हुन्– कमरेड भीमप्रसाद भट्टराई ।
केही दिनअघि मात्रै मन्त्रालयको कर्मचारी प्रशासन महाशाखामा आएका भट्टराई एमाओवादी निकटस्थ कर्मचारी युनियनमा सम्बद्ध छन् । यसअघि उनी श्रम तथा यातायात मन्त्रालयमा कार्यरत थिए । त्यसपछि उनी सामान्य प्रशासन मन्त्रालयमा सरुवा भएर आएका थिए । सामान्य प्रशासनमा रहेकै बेला बढुवा भएका उनी हालै मात्र उद्योगको कर्मचारी प्रशासन महाशाखामा ल्याइएका हुन् ।
सूत्रका अनुसार, भट्टराईलाई उद्योग मन्त्रालयमा ल्याउनका लागि एमालेनिकट एक जना कर्मचारीले सिफारिस गरेका थिए । अहिले निर्वाचन आयोगमा कार्यरत एमालेनिकट एक सहसचिवले भट्टराईको नाम सिफारिस गरेको बुझिएको छ । मन्त्री थापाको खुसीका साथ मन्त्रालयमा सरुवाका लागि स्वीकृति दिएको बुझिएको छ । अहिले एमाओवादीसम्बद्ध कर्मचारीलाई किन मन्त्री थापाले ल्याए र एमालेसम्बद्ध कर्मचारीले नै किन उनलाई सिफारिस गरे भन्नेबारे खोजी भइरहेको बताइन्छ ।
यसअघि पनि मन्त्री थापाले आफ्नो स्वकीय सचिवमा एमाओवादीनिकट कर्मचारीलाई नै भर्ना गरेका थिए । मन्त्री थापाले नियुक्त गरेका एमाओवादी समर्थक धामी थरका ती कर्मचारीलाई किन पीए बनाइयो ? भन्नेमा चर्को विरोध भएको थियो ।
अहिले पनि एमाले निकटस्थ कर्मचारीहरू विभिन्न ठाउँमा जगेडामा राखिएका छन् । नेपाली कांग्रेसका मन्त्रीहरूले आफ्नो मन्त्रालयमा छानीछानी पार्टीसम्बद्ध कर्मचारीहरूलाई नै मौका दिइरहेका छन् । तर, एमाले मन्त्री थापाले भने किन एमाओवादीसम्बद्ध कर्मचारीप्रति मोह दर्साएका हुन् ? एमालेका कर्मचारीहरू नै अहिले चकित परेका छन् ।

One response to “कर्णलाई माओवादी कति प्यारो !”

1. R k Ghimire says:

   September 13, 2014 at 1:10 pm

   Mantri thapa le ramro gareka raichhan . Congress le je garo Tehi garnai parchha ra . Ani karmachari ko kam rajniti garne hoena keko congress , k ko amale k maobadi ! Tini haru jagir Khana gayaka Hun jaha bhayapani jagir Khaya bhaigoni! Karmachari lai party p m garaunai hudaina !

   Reply