२१ चैत्र २०७१, शनिबार ०१:४९ बुधवार साप्ताहिक, नयाँबानेश्वर, काठमाण्डौं

त्यता पनि माधवकै मान्छे

काठमाडौं । एमालेको महाधिवेशन सम्पन्न भएको १० पहिना पुग्दा पनि त्यतिबेलाकै प्यानलका आधारमा स्थानीय तहसम्म निर्वाचन हुने क्रम रोकिएको छैन । यसक्रममा उदयपुरमा अध्यक्ष केपी ओली र बरिष्ठ नेता माधवकुमार नेपालको खेमा बाँडिएर भएको चुनावमा नेपाल पक्षधरले जितेका छन् ।
शनिवार विहान सकिएको सातौँ जिल्ला अधिवेशनको मतगणना अनुसार ओली पक्षधर दुर्गा थापालाई २७ मतले पराजित गर्दै नेपाल पक्षधर ईश्वर राउत चार वर्षका लागि जिल्ला अध्यक्ष चुनिएका छन् । उदयपुरमा यसअघि ओली पक्षधर वेदप्रसाद पोखरेलको नेतृत्व थियो । उपाध्यक्षमा राउतको प्यानलका गीता रेग्मी र कालु लामा भिडेकाले थापा प्यानलका विमल कार्कीलाई चिठा परेको छ भने सचिव र उपसचिवमा रावत प्यानलकै प्रमेश घिमिरे र काजी श्रेष्ठले जितेका छन् ।
६३ सदस्यीय जिल्ला कमिटीमा अधिकांश नेपाल पक्षधरले जितेका छन् । केन्द्रीय सदस्य जगन्नाथ खतिवडा, पूर्वसांसद सुरेश कार्कीलगायतका नेताहरु नेपाल पक्षलाई जिताउन र सगरमाथा इन्चार्ज रामप्रित पासवान, पूर्वसांसद विष्णुबहादुर रावतलगायतका नेताहरु ओली पक्षलाई जिताउन फिल्डमा खटिएका थिए । अधिवेशनको उद्घाटन गर्न पुगेका महासचिव ईश्वर पोखरेलले ओली .पक्षधर नेताहरुलाई अलग्गै भेटेर जित्न उत्साहित पारेर फर्किएका थिए ।
पछिल्लो दिनमा भएका जिल्ला अधिवेशनहरुमा एकपछि अर्को गर्दै नेपाल पक्षधरहरुले जित्दै आएका छन् । पहिला ओली पक्षधरहरुको पकडमा रहेका जाजरकोट, सुर्खेत, बाँके, सर्लाही, धनुषा, सिरहा, डडेल्धुरालगायतका जिल्लामा नेपाल पक्षले विजय हासिल गरेको छ ।
आगामी साता महोत्तरी र ओखलढुंगामा एमालेका जिल्ला अधिवेशनहरु हुँदैछन् ।