२३ बैशाख २०७२, बुधबार ०९:४० बुधवार साप्ताहिक, नयाँबानेश्वर, काठमाण्डौं

भूकम्पबाट कति क्षति ?

काठमाडौं । बैशाख १२ गते दिउँसो ११.५६ बजे आएको बिनाशकारी महाभूकम्पका कारण हिजोसम्म ७ हजार ५ सय ५७ जनाको ज्यान गइसकेको छ ।
मृत्यु हुनेहरूमा सिन्धुपाल्चोकमा २९ सय ११, नुवाकोटमा ९ सय ४, धादिङमा ६ सय ८०, गोरखामा ४ सय १२, रसुवामा ४ सय ३३, काभ्ेरमा ३ सय १५, भक्तपुरमा ३ सय ४,  ललितपुरमा १ सय ७३, काठमाडौंमा १२ सय २, दोलखामा ६९, मकवानपुरमा ३४, रामेछापमा २६, सोलुखुम्बुमा २२, ओखलढुंगामा १९ र सिन्धुलीमा १० जना छन् ।
तीमध्ये नेपाली सेना ३, नेपाल प्रहरी ५, शसस्त्र प्रहरी १, निजामति कर्मचारी ११ र विदेशी नागरिक ५७ जना रहेको गृह मन्त्रालयले जनाएको छ ।
यस्तै, १४ हजार ५ सय ३६ जना घाइते भएका छन् । जसमा सर्वसाधारण १४ हजार १ सय ५९, नेपाल प्रहरी १ सय ४०, सशस्त्र प्रहरी २१, विदेशी नागरिक ५१ जना छन् ।
गृह मन्त्रालयका अनुसार, २ लाख १ हजार ८ सय २ घर पूर्णरूपमा ध्वस्त भएका छन् भने १ लाख ८९ हजार ९ सय ३ घरमा आंशिक क्षति पुगेको छ ।
क्षतिको विवरण संकलन गर्ने काम जारी रहेकाले अन्तिम रिपोर्ट आइनसेको पनि गृहले जनाएको छ । राहत वितरणका लागि अति प्रभावित जिल्लाहरूमा अहिलेसम्म झण्डै २ अर्व रुपियाँ निकासा गरेर पठाइसकिएको पनि जनाइएको छ ।महाभूकम्पबाट सबैभन्दा बढी क्षति सिन्धुपाल्चोक जिल्लामा भएको छ । उक्त जिल्लामा मात्र मृतकको संख्या ३ हजार ५ सय नाघेको छ ।