१४ जेष्ठ २०७२, बिहीबार ०५:४७ बुधवार साप्ताहिक, नयाँबानेश्वर, काठमाण्डौं

महासचिवद्वारा तलब त्याग

काठमाडौं । नेकपा (एमाले) का महासचिव ईश्वर पोखरेलले पार्टी काम गरेबापत पार्टीको केन्द्रीय कोषबाट नियमित प्राप्त हुने पारिश्रमिक त्याग गर्नुभएको छ । आफूले पूरै कार्यकाल (पाँच वर्ष) पाउने पारिश्रमिक पार्टीले भूकम्प पीडितका लागि खोलेको खातामा जम्मा गर्न उहाँले केन्द्रीय लेखा शाखालाई निर्देशन दिएको बुझिएको छ ।स्रोतका अनुसार, एमालेका पदाधिकारीलाई विशेष पारिश्रमिक नभई सबै केन्द्रीय सदस्यहरूले पाउने सरह मासिक १० हजार रुपियाँ प्राप्त हुन्छ । नवौं महाधिवेशन सम्पन्न भएयता १० महिनामा बुझेको पारिश्रमिक पनि फिर्ता गरी उहाँका तर्फबाट राहत कोषमा एकमुष्ट ६ लाख रुपियाँ जम्मा हुँदैछ । लेखा शाखा प्रमुख खेम पौडेलले भन्नुभयो– ‘महासचिव कमरेडले यो प्रचारको विषय होइन, मेरो पारिश्रमिक हिसाब गरी भूकम्प पीडित राहत कोषमा जम्मा गरिदिनु भन्नुभएको छ ।’
एमालेले अध्यक्ष र महासचिवलाई मासिक पारिश्रमिकका अलावा एक स्वकीय सचिव र खर्च भए जति इन्धनको व्यवस्था गर्ने गरेको छ । यसअघि सभासद् गगन थापा, कृपासुर शेर्पा र अभिशेषकप्रताप साहले सभासद् हुञ्जलेको पारिश्रमिक भूकम्पपीडितका लागि खर्च गर्ने घोषणा गरिसक्नुभएको छ ।