२ भाद्र २०७२, बुधबार ०७:३६ बुधवार साप्ताहिक, नयाँबानेश्वर, काठमाण्डौं

छापेको समाचारमा साइबर क्राइम !

काठमाडौं । कुनै पनि छापा माध्यममा प्रकाशित समाचारलाई लिएर साइवर अपराधको मुद्दा चलाउनु कतिसम्म उचित कुरा हो । तर, साँघु साप्ताहिकका सम्पादक गोपाल बुढाथोकीलाई भने अहिले साइवर अपराधअन्तर्गत प्रहरीले पक्राउ पुर्जी जारी गरेर कहीँ नभएको जात्रा, हाँडीगाउँमा भन्ने भनाइ चरितार्थ गर्न पुगेको छ ।
केही हप्ताअघि उक्त पत्रिकामा प्रकाशित एक समाचारलाई लिएर पत्रकार बुढाथोकीमाथि अहिले प्रहरीले खोजी गरिरहेको छ । तर, पत्रकार बुढाथोकीलाई प्रहरीले दिएको दु:खप्रति विभिन्न सञ्चारसम्बद्ध संस्थाहरूले विरोध जनाएका छन् । पत्रिकामा प्रकाशित समाचारलाई लिएर उजुरी गर्ने निकायहरू हुँदाहुँदै बुढाथोकीको काठमाडौं, मण्डिखाटारस्थित घरमा खानतलासी गर्ने प्रहरीको कार्यप्रति सञ्चारसम्बद्ध संस्थाहरूले विरोध जनाएका हुन् ।
बुढाथोकीको घर खानतलासी र उनीमाथि पक्राउ पुर्जी जारी गरिएकोमा नेपाल पत्रकार महासंघ, प्रेस काउन्सिल, प्रेस चौतारी नेपाल, क्रान्तिकारी पत्रकार संघलगायत सञ्चारसम्बद्ध संस्थाहरूले विरोध जनाएका हुन् । पत्रिकामा प्रकाशित समाचारप्रति पीडितको आपत्ति भए प्रेस काउन्सिलमा उजुरी गर्न सकिने प्रावधान हुँदाहुँदै प्रहरीमार्फत् कारबाही गर्न खोजिएकोमा संस्थाहरूले आपत्ति जनाएका हुन् । त्यसैगरी, राष्ट्रिय मानवअधिकार आयोगले पनि सो घटनाप्रति खेद प्रकट गरेको छ । साथै आयोगले नेपाली प्रहरीलाई पत्र लेख्दै पत्रकार बुढाथोकीलाई पक्राउ गर्नुपर्नाको कारण उल्लेख गर्न माग गरेको छ । साँघु साप्ताहिकमा प्रकाशित समाचार एउटा अनलाइनले साभार गरेर प्रवाहित गरेपछि विद्युतीय ऐनअन्तर्गत सम्पादक बुढाथोकीलाई कारबाही गर्न खोजिएको थियो ।a