१४ आश्विन २०७३, शुक्रबार ०६:०३ बुधवार साप्ताहिक, नयाँबानेश्वर, काठमाण्डौं

पद बचाउन प्रदीपको चलखेल

काठमाडौं । पोखरा अन्तर्राष्ट्रिय विमानस्थल आयोजनाका प्रमुख इन्जिनियर प्रदीप अधिकारी आफ्नो पद बचाउने अभियानमा लागेका छन् । राम्रो र मालदार स्थान भएका कारण सेटिङ मिलाएर सो आयोजनामा पुगेका उनी पर्यटनमन्त्री फेरिएसँगै संकटमा परेको बताइन्छ ।

पूर्ववर्ती सरकारको पालामा एमालेले पर्यटन मन्त्रालयको जिम्मेवारी पाएपछि उनी सो आयोजना प्रमुख हुन पुगे पनि त्यहाँ आर्थिक अनियमिततामा बाजी मारेपछि उनलाई अहिले सो पद जोगाउन मुस्किल परेको बताइन्छ । पाँच महिनाअघि आयोजना पुगेका अधिकारीले त्यहाँ अनियमितता र भ्रष्टाचारको शृंखला नै चलाएपछि पर्यटन मन्त्रालयले सहसचिव सुरेश अधिकारीको संयोजकत्वमा छानबिन कमिटी गठन गरेको थियो । सो कमिटीले स्पष्टीकरण लिएका अधिकारीले अरूलाई ‘उल्टै आफ्नो विरोध गरे जागिर खाइदिने’ धम्की दिँदै हिँड्ने गरेको आयोजनाका एक अधिकारीले बताए ।

केही दिनअघि मात्र नेपाल इन्जिनियर्स एसोसिएसनको निर्वाचनमा महासचिवको उम्मेदवार बनेका अधिकारीले निर्वाचनका लागि भन्दै आयोजनाका ठेकेदार र परियोजना प्रमुखहरूसँग लाखौं रकम उठाएको पनि बुझिएको छ । चार वर्षमा बनिसक्नुपर्ने सो आयोजना प्रमुख अधिकारीका कारण समयमा पूरा नहुने अवस्था उत्पन्न भएको बताइन्छ । अधिकारीले सो परियोजनाको ३ सय रोपनी जग्गा अधिग्रहण गर्दा व्यापक कमिसन लिनुका साथै आयोजनालाई अनावश्यक व्ययभार थोपर्न कार्यालयमा गाडी हुँदाहुँदै अर्को गाडी भाडामा लिएका थिए । त्यस्तै ढल निकास र नाला खन्ने क्रममा पहिले अनावश्यक स्थानमा खन्न लगाएको र फेरि भत्काएर दोहारो खर्च गराएको बताइन्छ । त्यति मात्र होइन, विमानस्थलमा भएको ग्यारेज भत्काउन लगाएर त्यहाँ भएका काठ तथा जस्तापाता सिधै जिन्सीमा लगत राख्न दिनुपर्नेमा ठेकेदारलाई प्रयोग गर्न दिएर कमिसन खाएको बताइएको छ ।

त्यसो त ‘बुधबार’ले यो विषयमा केही अघि नै समाचार प्रकाशन गरेपछि प्राधिकरणका वरिष्ठ इन्जिनियर ध्रुव मोचिभयाको संयोजकत्वमा छानबिन भइरहेको बताइन्छ । सो कमिटीलाई प्रभावित गरेर आफू निर्दोष साबित हुन अधिकारीले निकै चलखेल गरिरहेको बुझिएको छ । यस विषयमा प्रतिक्रिया लिन उनको मोबाइलमा सम्पर्क गर्दा कल फरवार्ड गरेकाले सम्पर्क हुन सकेन । यता, नेपाल नागरिक उड्ययन प्राधिकरणका महानिर्देशक सञ्जीव गौतम अहिले पर्यटनमन्त्री जीवनकुमार शाहीसहितको जम्बो टोली लिएर क्यानडा भ्रमणमा गएका छन् । महानिर्देशक गौतम मात्र गए हुने उक्त कार्यक्रमका लागि चाकडी बजाउनकै निम्ति मन्त्री शाहीसमेतलाई लिएर गएको बताइन्छ । सो टोलीले दैनिक ५ सय डलर भत्ता लिने बताइएको छ ।