१० कार्तिक २०७३, बुधबार ०६:३२ बुधवार साप्ताहिक, नयाँबानेश्वर, काठमाण्डौं

लोकमानका सारथि सिटौला र घिमिरे

काठमाडौं । नेपाली कांग्रेसको केन्द्रीय कमिटी बैठकमा दुईजना सदस्यले मात्र अख्तियार दुरुपयोग अनुसन्धान आयोगका प्रमुख आयुक्त लोकमान सिंह कार्कीको पक्षका खुलेर वकालत गरेका छन् ।
८५ सदस्यीय केन्द्रीय कमिटीमा ११ जना सदस्य मनोनयन गर्न नै बाँकी छ । बाँकी ७४ सदस्यमध्ये गत महाधिवेशनमा खुलाबाट अन्तिम पच्चिसौंभित्र परेर जितेका मीनेन्द्र रिजाल र पहिलोपटक केन्द्रीय सदस्य भएका गुरुराज घिमिरेले मात्र लोकमानको बचाउ गरेका छन् ।

विद्यार्थी पृष्ठभूमिबाट आएका युवा नेताहरू गगन थापा, विश्वप्रकाश शर्मा, धनराज गुरुङ, प्रदीप पौडेललगायतका नेताहरूले कार्कीविरुद्धको महाअभियोगको पक्षमा पार्टीले निर्णय लिनुपर्ने भनेर दबाब दिइरहेका बेला घिमिरेले केन्द्रीय कमिटी बैठकमा नांगो ढंगले कार्कीको बचाउ गरेको देखेर अरू सदस्यसमेत आश्चर्य मानेका थिए । कार्कीको समर्थन गर्ने रिजाल र घिमिरे दुवै कार्कीको गृह जिल्ला मोरङ निवासी हुन् । कांग्रेसनिकट स्रोतले भन्यो –‘यी दुवै नेताको दानापानीको बन्दोबस्त नै कार्कीले मिलाइदिएका छन्, किन जोगाउन नखोजून् त ?

अधिकांश सदस्य कार्कीको महाअभियोगको विपक्षमा भनेर बाहिर प्रचार भएजस्तो पार्टीभित्रको बैठकमा नभएको एक केन्द्रीय सदस्यले बताए । उनले भने– ‘धेरैको धारणा कार्की गलत मान्छे हुन् भन्ने नै छ, तर महाअभियोगको प्रस्ताव छापामार तरिकाले कांग्रेससँग छलफल नै नगरी आएकोमा मात्र विरोध हो, तर रिजाल र घिमिरेले मात्र कार्कीको बचाउ गरेका छन् ।’ सत्तारूढ र त्यो पनि प्रमुख पार्टीलाई पत्तै नदिई प्रस्ताव आएकाले यसको विधिमान मात्र अधिकांश सदस्यले विरोध जनाएको स्रोतको दाबी छ ।

उनीहरूले यसबारे प्रधानमन्त्री पुष्पकमल दाहालसँग प्रस्टीकरण लिएर मात्र महाअभियोगको पक्षमा निर्णय लिनुपर्ने धारणा राखेको बताइन्छ । त्यसो त सभापति शेरबहादुर देउवाले पटकपटक जनभावना बुझेर त्यसैअनुरूप निर्णय लिने भन्दै महाअभियोगको पक्षमा निर्णय लिने संकेत दिइसकेका छन् ।