२८ कार्तिक २०७३, आईतवार ०५:२३ बुधवार साप्ताहिक, नयाँबानेश्वर, काठमाण्डौं

मुखर्जी–नेपाल भेटमा के भयो ?

काठमाडौं । नेपाल भ्रमणका क्रममा भारतीय राष्ट्रपति प्रवण मुखर्जीले तीन प्रमुख दललाई प्रतिनिधिमण्डल तहमा र सात मधेसी दललाई संयुक्त रूपमा भेट्नेबाहेकको सूचीमा थिए, राष्ट्रपति मुखर्जीका पुराना मित्र पूर्वप्रधानमन्त्री माधवकुमार नेपाल । नेपाल ०५१ सालमा उपप्रधानमन्त्री तथा परराष्ट्रमन्त्री हुने बेलादेखि जोडिएको दुई नेताबीचको मित्रताले कात्तिक १८ गते बिहान हयात होटलमा २५ मिनेटको भेटवार्ता जुराएको थियो ।

नेकपा (एमाले) वैदेशिक मामिला विभाग प्रमुखसमेत रहनुभएका वरिष्ठ नेता नेपालको राष्ट्रपति मुखर्जीसँग भेटवार्ता अघिल्लो साँझ राष्ट्रपति विद्यादेवी भण्डारीले सोल्टीमा आयोजना गरेको स्टेट ब्यांक्वेटको कार्यक्रममा भएको थियो । दुवैजनाले एकअर्काको सन्चो–बिसन्चो सोधपुछ गरेपछि मुखर्जीले अरू कुरा भोलि भेट्दा गरौंला भनेका थिए ।

राष्ट्रपति मुखर्जी र पूर्वप्रधानमन्त्री नेपालबीच ०५१ सालदेखि मित्रता छ । ०६६ मा नेपाल प्रधानमन्त्री भएको बेला मुखर्जी भारतीय अर्थमन्त्रीका रूपमा दुईपटक नेपाल आएका थिए भने पछि भारत जाँदा नेपालले उनलाई राष्ट्रपतिका रूपमा भेटेका थिए । १२ बुँदे सहमति गरेर माओवादीलाई शान्तिपूर्ण राजनीतिक धारमा ल्याउन भारतले गरेको पहलमा मुख्य भूमिका मुखर्जीले नै खेलेको मानिन्छ । त्यस प्रक्रियामा एमालेका तत्कालीन महासचिव नेपाल अविच्छिन्न रूपमा जोडिएकाले पनि उनीहरूबीच विभिन्न चरणमा कुराकानीहरू भएका थिए ।

भेटका क्रममा दुई नेताबीच दुई देशको सम्बन्धलाई प्रगाढ र पारस्परिक हितमा अभिवृद्धि गर्नेबारेमा कुरा भएको थियो । दुई स्वतन्त्र र सार्वभौम मुलुकका बीचमा कायम हुने हार्दिकता र असल सम्बन्धले दुवै देशका जनतालाई लाभ हुनेबारे उनीहरूले चर्चा गर्नुभएको थियो । भेटका क्रममा राष्ट्रपति मुखर्जीले वरिष्ठ नेता नेपाललाई भारत भ्रमणको निम्ता दिनुभएको थियो ।

एमालेको प्रतिनिधिमण्डलले साँझ अलग्गै भेटेको थियो । अध्यक्ष केपी शर्मा ओली, उपाध्यक्ष वामदेव गौतम, अष्टलक्ष्मी शाक्य र भीमबहादुर रावल, महसचिव ईश्वर पोखरेल, उपमहासचिव विष्णुप्रसाद पौडेलसहितको टोलीले ह्यातमा करिब १६ मिनेट कुरा गरेको थियो । भेटका अवसरमा दुई देशको आपसी सम्बन्ध विस्तार र सुदृढीकरणका विषयमा कुराकानी भएको थियो ।