२८ कार्तिक २०७३, आईतवार ०५:३२ बुधवार साप्ताहिक, नयाँबानेश्वर, काठमाण्डौं

ऊर्जामन्त्री र राज्यमन्त्रीले गरे प्राधिकरणको गाडी दुरुपयोग

काठमाडौं । नयाँ मन्त्री आएपछि नेपाल विद्युत् प्राधिकरणका मूल्यवान् गाडीहरू कब्जामा लिने र दुरुपयोग गर्ने चलन पहिलेदेखि नै चल्दै आएको हो । पूर्ववर्ति केही मन्त्रीहरूबाट गाडी दुरुपयोग गर्ने क्रममा केही कमी आए पनि अहिलेका ऊर्जामन्त्री र राज्यमन्त्रीले भने प्राधिकरणअन्तर्गत विभिन्न जलविद्युत् आयोजनाहरूका मूल्यवान् गाडी दुरुपयोग गर्ने काममा तीव्रता दिएका छन् ।

रमाइलो कुरा त के छ भने वर्तमान ऊर्जामन्त्री जनार्दन शर्माले भन्दा राज्यमन्त्री सत्यनारायण भगतले प्राधिकरणका दुईवटा महँगो मूल्य पर्ने गाडी चढिरहेका छन् । राज्यमन्त्रीमा नियुक्त हुनेबित्तिकै भगतले प्राधिकरणको उच्च तहको कर्मचारीलाई दबाब दिएर बा६च १००९ नम्बरको गाडी झिकाएर चढ्न थालेका हुन् । राज्यमन्त्रीले अहिले चढिरहेको गाडीलाई करिब अढाई करोड रुपैयाँ पर्ने जनाइन्छ । त्यस्तै, राज्यमन्त्री भगतले प्राधिकरणकै बा१ञ ३२२१ नम्बरको स्कोर्पियो पनि प्रयोग गरिरहेका छन् । उक्त गाडी उनले कार्यकर्ता र आफन्तहरूको काममा प्रयोग गर्दै आएका छन् ।

ऊर्जामन्त्री शर्माले भने प्राधिकरणको बा१३च ५७९३ नम्बरको गाडी चढिरहेका छन् । सो गाडीको मूल्य करिब डेढ करोड पर्ने जनाइन्छ । त्यस्तै, मन्त्री शर्माको सचिवालयले भने बा३च ४०५२ नम्बरको गाडी प्रयोग गरिरहेको छ । यसबाहेक ट्रान्समिसन आयोजनाका गाडीहरू पनि बेलाबेला झिकाएर मन्त्रीको सचिवालयले प्रयोग गर्दै आइरहेको छ ।

प्राधिकरणका गाडीहरू उपत्यकाबाहिर जाँदा पनि व्यापक दुरुपयोग हुने गरेको पाइएको छ । मन्त्री र राज्य मन्त्रीको सचिवालयले उपत्यका बाहिर गाडी लैजाँदा चालकको भ्रमण भत्ता, सबै इन्धन खर्च पनि प्राधिकरणले नै बेहोर्दै आएको छ । कतिपय बेलामा त इन्धनचाहिँ प्राधिकरण र मन्त्रालय दुवैतिरबाट लिएको पनि पाइएको छ ।

पूर्ववर्ती ऊर्जामन्त्रीहरू टोपबहादुर रायमाझीले भने दुईवटा र राधा ज्ञवालीले भने एउटा मात्रै गाडी प्राधिकरणबाट झिकाएर चढेका थिए । तर, अहिलेका मन्त्री र राज्यमन्त्रीले भने पाँच वटाभन्दा बढी नै प्राधिकरणको गाडी प्रयोग गरेर दुरुपयोग गरेपछि अहिले त्यसको प्राधिकरणभित्रै तीव्र रूपमा विरोध हुन थालेको छ ।