८ मंसिर २०७३, बुधबार ०४:४३ बुधवार साप्ताहिक, नयाँबानेश्वर, काठमाण्डौं

एयरपोर्टको सेटिङमा एआईजीकै संलग्नता

काठमाडौं । पछिल्लो समय त्रिभुवन अन्तर्राष्ट्रिय विमानस्थलमा सेटिङ गरेर हुने तस्करी धन्दा मौलाएको छ । नेपाल प्रहरीले प्रत्यक्ष निगरानी राख्दै आएको उक्त क्षेत्रका अवैध र ओसारपसारमा प्रतिबन्धित सामग्री खुलेआम आयात निर्यात गरेर तस्करी बढेको हो । अहिले एयरपोर्टको मुख्य जिम्मेवारी नेपाल प्रहरीका डीआईजी गोविन्द निरौलाले लिएका छन् । तर, उनलाई पत्तो नदिईकन एसएसपी श्याम खत्री, एसपी प्रमोद खरेल, डीएसपी टीका केसीलगायतले तस्करीको लाइन मिलाएको बताइन्छ । अघिल्लो हप्ता डीआईजी निरौला स्वदेशमा थिएनन् । तर, उनलाई आशंका लागेकाले उनले पछिल्लो चरणमा आफ्ना केही मान्छेलाई सूक्ष्म ढंगले अध्ययनका लागि जिम्मेवारी दिएका थिए ।

त्यही क्रममा एयरपोर्टको मुख्य घेरा पार गरिसकेपछि विमानमा चढाउन लाग्दा एक जवानले ठूलो परणाममा काँचो मासु, सुकुटीलगायतका सामान बरामद गरे । प्रतिबन्धित वन्यजन्तु मृगलगायतको सुकुटी त्यसरी लामो समयदेखि सेटिङमा विदेश पठाइरहेको पुष्टि जब भयो, तब उक्त दिन ठूलो परिमाणमा फेला प¥यो । हाकिमहरूको उक्त सेटिङको सूचना आफूसँग नपुगेकाले उनले उक्त सामान बरामद त गरे, तर उक्त कारणबाट नै उनीमाथि दशा आइलाग्यो । महानगरीय प्रहरी परिसरबाट काजमा आएका ती सिपाहीको त्यसपछि हाकिमहरूले तुरुन्त सरुवा गरिदिए । उनी सिकायत गर्दै मेट्रोका एआईजी प्रतापसिंह थापाकहाँ पुगे र अनुरोध गरे डीआईजी निरौला नेपाल नफर्किउन्जेल आफूलाई नचलाइयोस् । डीआईजी आएपछि आफूले गल्ती नै गरेको भए पनि सजाय भोग्न तयार रहेको भनिरहँदा पनि एआईजी थापाले उनको गुनासो सुनेनन् ।

एसएसपी, एसपी र डीएसपीको कुरा मात्र नसुनीकन डीआईजी नफर्किउन्जेल कुर्न र उनीसँग यथार्थ बुझेर मात्र ती कर्मचारीलाई चलाउन केही आफन्तले आग्रह गरे पनि एआईजी थापाले भने तिनै सेटिङवाला अधिकारीहरूको पक्ष लिएको बताइन्छ । भेटघाटमा ती अधिकारीको नियत ‘ठिक छैन’ भनेर अनुरोध गर्दा एआईजी थापाले ‘डीआईजीको नियत पनि त ठीक नहुन सक्छ’ भन्ने जवाफ दिएको बताइन्छ । यस्तो कदमले केही गरेर देखाउँछु भन्ने कर्मचारीलाई हतोत्साही पारेको बताइएको छ । त्यसो त लामो समयदेखि भिजिट भिसा लिएर काम गर्न जाने कामदारलाई पठाउने, काँचो सुन अवैध रूपमा ल्याउनेलाई पैसा लिएर उन्मुक्ति दिने, प्रतिबन्धित पदार्थहरू ओसारपसार गर्ने काम विमानस्थलमा कसको संलग्नता र संरक्षणमा भइरहेको रहेछ भन्ने कुरा यस घटनापछि पुष्टि भएको छ । अकूत सम्पत्ति आर्जन गरिसकेका एआईजी थापालाई पछिल्लो समय अख्तियारले पनि सम्पत्ति छानबिनको घेरामा राखेको छ ।