३१ चैत्र २०७३, बिहीबार ०७:५८ बुधवार साप्ताहिक, नयाँबानेश्वर, काठमाण्डौं

यसरी जिल्लिए बालकृष्ण

काठमाडौं । उपप्रधानमन्त्री तथा गृहमन्त्री विमलेन्द्र निधिले राजनीनामा देलान् र गृहमन्त्री पड्काउला भनेर बसेका रक्षामन्त्री बालकृष्ण खाँडको सपना पनि तुहिएको छ । गृहमन्त्री निधिले मन्त्रिपरिषद्को मर्यादाक्रममा प्रधानमन्त्रीपछिको पहिलो वरीयता नपाए राजीनामा दिने घोषणा गरेपछि खाँडले गृहमन्त्री बन्ने सपना बुनेका थिए ।

विश्वस्त स्रोतका अनुसार उनले त्यसका लागि पार्टी सभापति शेरबहादुर देउवालाइ पनि मनाइसकेका थिए । निधिले राजीनामा दिएपछि पार्टीको तर्फबाट नेतृत्व गर्ने गरी गोपालमान श्रेष्ठलाई उपप्रधानसहित रक्षा दिएर पठाउने र रक्षा सम्हाल्दै आएका खाँडलाई गृहमन्त्री बनाउने आन्तरिक तयारी देउवा समूहले गरि पनि सकेको थियो । यही तयारीअनुसार देउवाले पछिल्लो समयमा प्रधानमन्त्री पुष्पकमल दाहाललाई फोन गरेर ‘निधिलाई तेस्रो वरीयता’ मा नै राख्न भनेका थिए । प्रहरी महानिरीक्षक नियुक्ति, राजदूत सिफारिसलगायतका प्रकरणमा आफूलाई नटेरेको भन्दै देउवा निधिसँग रुष्ट बनेका थिए । स्रोतका अनुसार देउवाको चाहना निधिले राजीनामा नै गरून् भन्ने थियो । तर, यसो गर्दा आफू प्रधानमन्त्री हुने वातावरण बिग्रिने देखेर देउवा फेरि ब्याक भएको बताइन्छ । ‘म प्रधानमन्त्री बन्नुपर्छ, तिमी बरु मन्त्रिपरिषद् बैठकमा नजानू, चुप लागेर बस्नू’ भन्ने सभापति देउवाको सल्लाहअनुसार नै निधि चुपचाप बसेको बुझिएको छ । तर, यो प्रकरणबाट देउवाले निधिलाई जाँचेको विश्लेषण पनि कांग्रेसवृत्तमा हुने गरेको छ । स्रोतले भन्यो, ‘निधिलाई म साइजमा राख्न सक्छु भन्ने देउवाले देखाइदिएका छन् ।’

 a