२३ माघ २०७५, बुधबार १२:२० बुधवार साप्ताहिक, नयाँबानेश्वर, काठमाण्डौं

स्वास्थ्यको पैसामा तामाङको गिद्धेनजर

माघ २३, ओखलढुंगा । स्वास्थ्य जस्तो संवेदनशील विषयमा पनि नेपाली कांग्रेसका नेता तथा कार्यकर्ताले कसरी नांगो खेलवाड गर्छन् भन्ने कुरा उदाहरण जिल्लाको सुनकोशी गाऊँपालिका वडा नं २ मा गरेको ब्रम्हलुटले प्रष्ट पार्छ ।
सुनकोशी गापा वडा नं २ मा स्वास्थ्य चौकी निमार्णका लागि छुट्याएको बजेट कांग्रेसका स्थानीय नेता वडा नं २ का सदस्य खिम तामाङले झ्वाम पारेका छन् । जनप्रतिनिधीसमेत रहेका तामाङले जनताको पक्षमा काम गर्नु त कता हो कता स्वास्थ्यमा जनताको पहुँचका लागि आएको पैसामा समेत गिद्धेनजर लगाएपछि एक वर्ष अघि नै बनिसक्नु पर्ने स्वास्थ्य चौकी भवनको अहिलेसम्म जगसम्म खन्ने काम भएको छैन ।
सो वडामा स्वास्थ्य चौकी भवन निर्माणका लागि दुईवर्षअघि स्वास्थ्यमन्त्रालयबाट ३ लाख ८० हजार रुपैया विनियोजन भएको थियो भने वडाले १ लाख रुपैया विनियोजन गरेको थियो । तर, तामाङले एक वर्ष अघि नै सबै (४ लाख ८० हजार) रुपैया झिकेका थिए । पैसा झिकेको १ वर्ष वित्तिसक्दा पनि भवन निर्माणको लागि सिन्को भाँच्ने सम्मको काम नभएको नेकपा सुनकोशी गापा वडा नं २ का सचिव प्रचण्ड खड्काले बताए । भवन निर्माण नहुँदा स्थानीयवासीले अझै पनि सामान्य स्वास्थ्य उपचारका लागि कठिनाइ भोग्नु परेको भन्दै उनले यथासक्य काम सुचारु गर्न आग्रह गरे । राज्यले विकासका लागि उपलब्ध गराएको पैसा जनप्रतिनिधी आफैले कुम्लाएको घटना आफूहरु टुलुटुलु हेरेर नवस्ने भन्दै खड्काले यथाशक्य काम शुरु नभए थप पहलका लागि सम्बन्धित निकाय जाने बताए ।