१७ फाल्गुन २०७५, शुक्रबार ०७:०२ बुधवार साप्ताहिक, नयाँबानेश्वर, काठमाण्डौं

नबिल बैंकलाई नेप्सेको कारवाही

काठमाडौं । नबिल बैंक नेपाल स्टक एक्सचेञ्ज (नेप्से) को कारावाहीमा परेको छ । बैंकीङ क्षेत्रको पायनियर दावी गर्ने अनिल केशरी शाह प्रमुख कार्यकारी प्रमुख रहेको नबिल बैंक नै नेप्सेको कारवाहीमा परेको हो । उक्त बैंकलाई नेप्सेले यही फागुन १० गते पत्र पठाई २४ घण्टे स्पष्टिकरण सोधेको हो । नेप्सेलाई उपलब्ध गराउनु पर्ने सूचना समय मै उपलब्ध नगराएको भन्दै बैंकलाई २४ घण्टे स्पष्टीकरण माग गरेको हो ।
सूचिकरण विनियमावली उल्लंघन गरेपछि नबिल बैंक नेप्सेको कारबाहीमा परेका हो । सूचिकरण सम्झौता अनुसार सार्वजनिक महत्वका सूचना कम्तिमा ७ दिन अघि जानकारी गराउनुपर्नेमा किन ढिलो जानकारी गराएको भन्दै नेप्सेले जवाफ माग गरेको छ । नेप्से सूचिकरण सम्झौताको बुँदा नम्बर १० अनुसार बुक क्लोज सम्बन्धी जानकारी बुक क्लेज हुने दिनभन्दा ७ दिनअघि नै जानकारी गराउनुपर्ने भन्ने छ । गत बिहीबार बैंकले फागुन २७ गते साधारण सभा गर्नका लागि फागुन १४ गतेदेखि बुक क्लोज गर्ने सूचना निकालेको थियो । उक्त जानकारी नेप्सेमा ढिलोगरी प्राप्त भएको नेप्सेले जनाएको छ ।
नेपाल स्टक एक्सचेञ्जले नबिल बैंक लिमिटेडलाई सूचना दिन समय लगाएको भन्दै स्पष्टीकरण सोधेपछि नबिल बैंकको करिअरमा दाग लागेको हो । स्टकका कामु सहायक प्रबन्धक सुबोध ढुङ्गेलका अनुसार बैंकको ३४ औँ साधारणसभा यही फागुन २७ गतेका लागि तोकिएको र धितोपत्र दर्ता बन्द यही फागुन १४ गते हुने भन्ने पत्र सात दिन पहिले पठाउनुपर्नेमा त्यस्तो नभएको पाइएको छ । ‘सात दिनभित्र जानकारी गराउनु पर्नेमा के कति कारणले सोको जानकारी ढिला भएको हो ? सो को कारण पत्र प्राप्त गरेको २४ घण्टाभित्र उपलब्ध गराइदिनुहुन निर्णय अनुसार अनुरोध छ ’ स्टकले बैंकलाई पत्राचार गरेको पत्रमा उल्लेख छ ।