२९ फाल्गुन २०७५, बुधबार ०६:०२ बुधवार साप्ताहिक, नयाँबानेश्वर, काठमाण्डौं

अमेरिका जाँदै प्रचण्ड

काठमाडौं । नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ पत्नी सीता दाहालको उपचारका लागि अमेरिका जाने भएका छन् । लामो समयदेखि अस्वस्थ सीताको उपचारका लागि चैत ४ गते प्रचण्ड अमेरिका जान लागेका हुन् । साथमा छोरी गंगा दाहाल पनि अमेरिका जाने बताइएको छ ।
वासिङ्टन डीसीस्थित नेपाली दूतावास स्रोतका अनुसार सीताको उपचार बाल्टिमोरस्थित जोन हप्किन्स अस्पतालमा हुनेछ । प्रचण्ड करिव ११ वर्षपछि अमेरिकाको भ्रमणमा जाँदै छन् । यसअघि सीताको उपचार बैंकक र सिंगापुरमा भए पनि त्यहाँ ठीक हुन नसकेपछि अमेरिका लैजाने तयारी भएको जनाइएको छ । छोरा प्रकाश दाहालको निधनपछि उनको स्वास्थ्य अवस्था कमजोर बनेको पारिवारिक स्रोत बताउँछ ।
भेनेजुएला प्रकरणअघि नै प्रचण्ड अमेरिका जाने तयारी भए पनि व्यस्तताका कारण उनको भ्रमण पछि सरेको थियो । भेनेजुएला प्रकरणपछि कतिपयले उनलाई अमेरिका नजान सुझाव दिए पनि अन्ततः प्रचण्ड अमेरिका जाने निश्चित भएको बताइएको छ ।