२० चैत्र २०७५, बुधबार ०५:०९ बुधवार साप्ताहिक, नयाँबानेश्वर, काठमाण्डौं

वैदेशिक रोजगारमा उही नियति

काठमाडौं । अख्तियार दुरुपयोग अनुसन्धान आयोगले वैदेशिक रोजगार विभाग बुद्धनगरमा कार्यरत नायब सुब्बा रामकुमार फुयाँललाई ६० हजार घुस लिएको आरोपमा रकमसहित नियन्त्रणमा लिएको छ ।
वैदेशिक रोजगारको लेनदेनको कागजमा साक्षी बसेका सेवाग्राहीलाई निजविरुद्ध उजुरी परेको र पक्राउ पुर्जी जारी गरिदिन्छु भन्दै पटकपटक कार्यालयमा बोलाएर डरधम्की देखाई सेवाग्राहीसँग घुस मागेको अख्तियारले आरोप लगाएको छ ।
नासु फुयाँलले सेवाग्राहीसँग ६० हजार घुस लिएर जोरपाटी चोकमा फलफूल पसल गर्ने ध्रुव खड्कालाई राख्न दिएका थिए । केही समयपछि उनै खड्कासँग उक्त घुसबापतको रकम लिँदै गर्दा उनीहरू दुवै जनालाई गोकर्णेश्वर नगरपालिका–५ जोरपाटी चोकस्थित सापकोटा मिठाई भण्डारबाट बिहीबार साँझ नियन्त्रणमा लिइएको हो ।
पछिल्लो समय श्रम तथा रोजगारमन्त्री गोकर्ण विष्टले यो क्षेत्र सुधारका लागि प्रयास गरेपनि उनकै सचिवालका सदस्यहरू भने उनलाई बदनाम गर्न लागिपरेका छन् । अहिले विभागअन्तर्गतका विभिन्न तहका कर्मचारीहरूले ठगी, अनियमितता तथा घुसखोरी पनि मन्त्रीको सचिवालयकै कर्मचारीको आडमा गर्ने गरेका छन् ।
मन्त्रालयकै निजी सचिवालयमा रहने व्यक्तिले संरक्षण गरेका कारण कहिले वैदेशिक रोजगार कार्यालय ताहाचल काठमाडौंमा त कहिले विभागमै रंगेहात घुससहित कर्मचारीहरू पक्राउ पर्न थालेको बताइन्छ । विभागका नायवसुब्बा फुयाँल घुस प्रकरणमा पर्दा पनि उनले मन्त्रीका निजी सचिवालयका शाखा अधिकृत प्रकाश पन्थीको नाम खुलासा गरेका थिए ।
माथिसम्म घुस पु¥याउनुपर्ने बाध्यताले आफूहरूले घुस खानुपरेको उनले साथीभाइलाई बताउँदै हिँडेका छन् । गुल्मीस्थित मन्त्रीकै निर्वाचन क्षेत्रका उनी गोकर्णमन्त्री भएदेखि नै सचिवालयमा आएका हुन् । उनले नै मन्त्रालयका कर्मचारीहरूलाई कसलाई कहाँ पठाउने भनेर खटनपटन गर्छन् ।
अधिकृत पन्थीकै जोडबलमा वैदेशिक रोजगार विभागअन्तर्गत काठमाडौं कार्यालय ताहाचलमा उपसचिवलाई निमित्त दिएर राखिएको छ । त्यहाँ आउन अन्य सहसचिवहरू राजी नै भए पनि झापा घर भएका देवेन्द्र कार्कीलाई घुसको सेटिङ मिलाउन नै निमित्त दिएर राखिएको बताइन्छ । निमित्त प्रमुख कार्की र शाखा अधिकृत पन्थी न्यायसेवामा नासु हुँदा सँगै थिए ।
ताहाचल कार्यालयमा विभिन्न शाखाहरूबाट तलैबाट कार्यालय प्रमुखलाई बुझाउनुपर्छ भन्दै सेवाग्राहीसँग नियमित रूपमा रकम उठाउने गरिएको छ । त्यतिबेला ‘अर्को हाकिमलाई पनि’ भन्दै रकम उटाउने गरिएको र सो रकम उनै पन्थीलाई छुट्ट्याइने गरिएको कर्मचारीहरू बताउँछन् । पन्थीका निकट व्यक्तिहरूबाट जतिसुकै अनियमितताको काम भए पनि निजी सचिव प्रकाश पन्थीले ढाकछोप गर्दै आएको बताइन्छ । कार्यालयमा व्यावसायिक छवि भएका र घुसको सेटिङ संलग्न हुन नचाहने कर्मचारीहरू भने आएको छोटो समयमै त्यहाँबाट निस्कन बाध्य हुने गरेको बताइन्छ ।
विभागका महानिर्देशक दिलीपकुमार चापागाईं पनि पीए पन्थीका अगाडि निरीह बन्ने गरेको बताइन्छ । त्यस्तै विभागका प्रशासन शाखाका निर्देशक भोलानाथ गुरागाईं पनि अनियमितता ढाकछोप गर्ने धन्दामा संलग्न भएको बताइएको छ ।