२२ जेष्ठ २०७६, बुधबार ०५:५० बुधवार साप्ताहिक, नयाँबानेश्वर, काठमाण्डौं

बालुवाटारमा डाकेर मानमर्दन

काठमाडौं । गत आइतबार बिहान माधवकुमार नेपाल निवास कोटेश्वरमा भीडभाड थियो । नेकपाका वरिष्ठ नेता नेपाल नेता–कार्यकर्ताहरूसँग भेटघाटमै व्यस्त थिए । त्यहीबीचमा नेपालको मोबाइलमा प्रधानमन्त्री केपी ओलीको घन्टी बज्यो–इमरजेन्सी छलफल गर्नुपर्ने भएकाले तुरुन्त बालुवाटार आइहाल्नुप¥यो ।
मुलुकको नेतृत्व गरिरहेका प्रधानमन्त्री र पार्टी अध्यक्ष ओलीबाटै त्यस्तो सन्देश आएपछि भेटघाट स्थगित गरेर वरिष्ठ नेता नेपाल बालुवाटार हान्निए । समय र वचनमा संवेदनशील नेता नेपाल केही समयपछि बालुवाटारमा उपस्थिति भए । शीर्ष नेताहरू कुनै बेला बालुवाटार आवतजावत हुने कुरा नौलो होइन । इमर्जेन्सी भनेर बोलाएका प्रधानमन्त्री ओली केहीबेर कुर्दा समेत ‘वेटिङ रुम’मा झरेनन् । प्रधानमन्त्री नआएपछि घडी हेर्दै नेपालले २५ मिनेट कुरे । प्रधानमन्त्री ओली भित्र त्यतिबेला प्रधानसेनापति राजेन्द्र क्षेत्रीसँगको छलफलमा थिए । तर, नेपाललाई कति समय पर्खनुपर्नेसमेत कुनै जानकारी नगराईएपछि उनी बालुवाटारबाट बाहिरिए । त्यसो त वरिष्ठ नेता नेपाल बाहिरिएपछि प्रधानमन्त्रीले उनलाई बीच बाटोबाटै फर्काउन प्रयास गरे । त्यहाँबाट बाहिरिएलगत्तै सम्पर्कविहीन बनेका नेपाललाई फर्काउन खोजिए पनि उनी बालुवाटार गएनन् । प्रधानमन्त्रीको व्यवहारबाट अपमानित महसुस गरेका वरिष्ठ नेता नेपाल तीन दिनपछि मंगलबार केन्द्रीय सचिवालयको बैठकको गृहकार्यका सिलसिलामा बालुवाटार पुगे । अर्का अध्यक्ष प्रचण्डसहितको छलफलमा वरिष्ठ नेता नेपालले यसरी मानमर्दन गर्ने हो भने आइन्दा बैठकको सिलसिलामा बाहेक आफू बालुवाटार नआउने भन्दै नेपालले सचेत गराएको स्रोतले जनाएको छ । नेपालसँग भेटघाट नभएपछि ओलीले आइतबार दिउँसो अध्यक्ष प्रचण्डसँग वान अन वान छलफल गरेका थिए ।
त्यसो त बालुवाटारमा अर्का अध्यक्ष पुष्पकमल दाहाल ‘प्रचण्ड’, वरिष्ठ नेता झलनाथ खनाल, नेता वामदेव गौतमलगायत शीर्ष तहकै नेताहरू प्रधानमन्त्री ओलीको यस्तो कार्यशैलीबाट पटकपटक आजित हुँदै आएका छन् । बैठकका लागि बोलाएर आधा घन्टाभन्दा कुराइएपछि यसअघि नेपालसहित चार शीर्ष नेताहरूले केन्द्रीय सचिवालय बैठक बहिष्कार गरेका थिए । त्यसबारे अध्यक्ष ओलीले प्रस्टीकरण मात्र नदिएर आइन्दा त्यस्ता कमजोरी नदोहोरिनेसमेत प्रतिबद्धता पनि जनाएका थिए । अध्यक्ष प्रचण्ड पनि ओलीलाई एक घण्टाभन्दा बढी समय कुर्ने नेतामध्येमै पर्छन् । पार्टीमा प्रधानमन्त्री ओलीकै निकट भनेर बाहिर चिनिएका केही मन्त्रीहरूसमेत क्याबिनेटमै पटक–पटक उनको शैलीबाट आजित हुँदै आएका छन् ।