४ असार २०७६, बुधबार ०८:११ बुधवार साप्ताहिक, नयाँबानेश्वर, काठमाण्डौं

किन गए प्रधानसेनापति चीन ?

काठमाडौं । प्रधानसेनापति पूर्णचन्द्र थापा असार १ गतेबाट चीनको भ्रमणमा गएका छन् । अमेरिका भ्रमणको कार्यसूची भए पनि उनी त्यसभन्दा अघि नै चिनियाँ जनमुक्ति सेनाको निमन्त्रणा गएका हुन् । त्यहाँ चीनले विपद् व्यवस्थापनसम्बन्धी सामग्री दिने भनिए पनि यो भ्रमण त्यसका लागि नभएर सैन्य कूटनीतिसँग जोडिएको बुझिएको छ ।
स्रोतका अनुसार अमेरिकाले नेपाल र श्रीलंकालाई इन्डोप्यासिफिकमा राखेपछि त्यसबाट चीन सशंकित छ । यसलाई चीनले रुचाएको छैन । सैन्य कूटनीतिमा भारतलाई अविश्वास गर्दै दक्षिण एसियाको सैन्यसम्बन्धी गोप्य सूचना नेपाल र श्रीलंकामार्फत लिने रणनीति अमेरिकाले अपनाएको चीनको बुझाइ छ ।
चीन विआइआइमा अगाडि बढेपछि अमेरिकाले दक्षिण एसियामा सैन्य कूटनीतिमार्फत प्रभाव बढाउन इन्डोप्यासिफिक फोरमको प्रयोग गरेको चिनियाँ बुझाइ छ र यसमा नेपाललाई सहभागी गराएपछि त्यसबारे बुझ्न प्रधानसेनापतिलाई आमन्त्रण गरेको बताइन्छ । प्रधानसेनापति थापा साउनको अन्तिमतिर अमेरिका जाँदै छन् । अमेरिकाको भ्रमण तय हुँदासम्म उनको चीन जाने कुनै कार्यक्रम नभए पनि एक्कासि निमन्त्रणा आएपछि उनी त्यसतर्फ गएको स्रोतको दाबी छ ।