८ माघ २०७६, बुधबार ०७:४३ बुधवार साप्ताहिक, नयाँबानेश्वर, काठमाण्डौं

कुचोले बढार्नुपर्ने कसिंगर हावाले…

काठमाडौं । नेपाल वायुसेवा निगमको अध्यक्षबाट मदन खरेलले राजीनामा दिएका छन् । आइतबार संस्कृति, पर्यटन तथा नागरिक उड्डयन सचिव केदारबाबु अधिकारीलाई राजीनामा बुझाएर उनी त्यसै दिन राति अस्ट्रेलिया हानिएका छन् । उनको राजीनामालाई ‘कुचोले बढार्नुपर्ने कसिंगर हावाले उडायो’ भन्ने नेपाली लोकोक्तिसँग दाँज्न थालिएको छ ।
धराशायी बनेको निगम सुधार्न आफंैले लिखित रूपमा व्यक्त गरेका प्रतिबद्धतामा एक इन्च पनि प्रगति गर्न नसकेपछि अन्ततः उनी आफैं राजीनामा दिएर टाप कसेका हुन् । त्यसो त उनले काम गर्न नसकेपछि संस्कृति, पर्यटन तथा नागरिक उड्डयन मन्त्री योगेश भट्टराईले पटकपटक मार्गप्रशस्त गर्न घुमाउरो तरिकाले दबाब दिँदै आएका थिए । विभागीय प्रमुखहरूसँगको छmफलका क्रममा खरेललाई इंगित गर्दै काम गर्न नसक्नेले कुर्सी छाड्दा हुन्छ भन्दै मन्त्री भट्टराईले घुमाउरो पारामा राजीनामा दिन आग्रह गरेका थिए । तर, प्रधानमन्त्री केपी ओलीले कार्यकारी भूमिकामा सुगतरंत्न कंसाकार छँदै २०७५ भदौमा खरेललाई कार्यकारी अध्यक्ष बनाएर ल्याएका थिए । यद्यपि ओलीसमेत उनीसँग सन्तुष्ट थिएनन् । गत वर्ष निगमको वार्षिकोत्सव समारोहलाई सम्बोधन गर्दै प्रधानमन्त्री ओलीले सरकारले निगमलाई एक पैसा पनि नदिने भन्दै असन्तुष्टि पोखेका थिए । तर, प्रधानमन्त्रीको मान्छे हुँ भन्दै धक्कु मात्र लगाउने र कमिसनबाहेक निगम सुधारका निम्ति सिन्कोसम्म नभाँच्ने उनको प्रवृत्तिबाट हैरान भएपछि कार्यरत २७ जना पाइलटले सामूहिक राजीनामाको तयारी गरेपछि उनी राजीनामा दिन बाध्य भएका हुन् । २०७० सालमा पनि उनलाई चार वर्षका लागि महाप्रबन्धक नियुक्त गरिएको थियो । त्यसबेला पनि उनी एक वर्षमै राजीनामा दिएर निगमबाट बाहिरिएका थिए ।
खरेलको राजीनामासँगै अब मन्त्री भट्टराईलाई धराशायी बनेको निगमलाई उनकै प्रतिबद्धताअनुसार एक नम्बरको वायुसेवा प्रदायक संस्था बनाउन बाटो खुलेको छ ।