७ फाल्गुन २०७६, बुधबार ०७:१३ बुधवार साप्ताहिक, नयाँबानेश्वर, काठमाण्डौं

आन्दोलनको तयारी निजामति

काठमाडौं । सत्तारूढ नेकपानिकट निजामती कर्मचारीहरूले कर्मचारी ट्रेड युनियन खारेज गरे आन्दोलन गर्ने चेतावनी दिएका छन् । उनीहरूले मंगलबार राजधानीमा पत्रकार सम्मेलन गरेरै सरकालाई यस्तो चेतावनी दिएका हुन् । नेपाल निजामती कर्मचारी संगठनले आफ्नो केन्द्रीय कमिटी बैठकका निर्णय सार्वजनिक गर्न आयोजना गरेको पत्रकार सम्मेलनमा ट्रेड युनियन खारेज गर्नेगरी ऐन ल्याइए आन्दोलन गर्ने र त्यसका लागि वरिष्ठ उपाध्यक्ष लेखनाथ कोइरालाको संयोजकत्वमा ‘आन्दोलन तयारी तथा परिचालन समिति’ गठन गरिसकेको समेत जानकारी गराइयो । संगठनका अध्यक्ष केदार देवकोटाले ट्रेड युनियन खारेज नगर्न सरकारलाई चेतावनी दिएको छ । फागुन २ र ३ गते भक्तपुरमा बसेको सातौं केन्द्रीय समितिको बैठकका निर्णयहरू सार्वजनिक गर्दै अध्यक्ष देवकोटाले ट्रेड युनियन खारेज गर्ने, संकुचित गर्ने र अधिकार खुम्च्याउने चलखेल भइरहेको भन्दै आन्दोलन नै गर्ने चेतावनी दिएका हुन् । उनीहरूले प्रशासनिक संरचनालाई कर्मचारी मैत्री बनाउँदै कर्मचारी समायोजन व्यवस्थापन हुनुपर्नेसमेत धारणा राखे । प्रस्तावित संघीय निजामती सेवा ऐनमा ट्रेड युनियन खारेज गर्नुुपर्ने छलफल उठेकोमा उनीहरूको आपत्ति थियो । उनीहरूले ट्रेड युनियन अधिकारमा संकुचन ल्याउन नहुने बताएका छन् । संघीय निजामती कर्मचारी सेवा ऐन निर्माणका क्रममा संसदीय समितिमा ट्रेड युनियन खारेज गर्नुपर्ने कुरा उठेको भन्दै त्यसमा आफूहरूको आपत्ति वरिष्ठ उपाध्यक्ष लेखनाथ कोइरालाले बताए । संसदको राज्य व्यवस्था तथा सुशासन समितिमा केही सांसदहरूले ट्रेड युनियन खारेज गर्नुपर्ने तथा अधिकार खुम्च्याउने बहस चलाएको भन्दै उनले आपत्ति जनाए ।
सो ऐन आफूहरूको सुझावसहित छिटो टुंग्याउनसमेत उनीहरूले आग्रह गरे । संघीय निजामती सेवा ऐन ल्याउन ढिलो हुँदा कर्मचारीका समस्या समाधान हुन नसकेको महासचिव रेवन्त गौतमले बताए । त्यस्तै, ट्रेड युनियनमा लाग्ने कर्मचारीहरूमाथि कार्यालयको काम नगरी ट्रेड युनियनको मात्र काम गर्ने आरोप लगाइएको भन्दै उनीहरूले त्यसको खण्डनसमेत गरे ।